‘गोपी’ को रिलिज डेट यस दिन सर्‍यो

काठमाडौं । चलचित्र ‘गोपी’ को रिलिज मिति दुई महिनाअघि सरेको छ । यसअघि चैतको १५ गते रिलिज गरिने भनिएको फिल्मलाई दर्शकको अनुरोधमा भन्दै निर्माण टिमले झण्डै दुई महिनाअघि सारेको हो । अब चलचित्र माघ १८ गते नै रिलिज हुने भएको हो ।

दीपेन्द्र लामाले निर्देशन गरेको यो फिल्ममा विपिन कार्की, सुरक्षा पन्त, वर्षा राउत लगायतका कलाकारको मुख्य भूमिका छ । वर्षा र विपिनले यसअघि फिल्म ‘जात्रा’ मा एकसाथ काम गरेपनि सुरक्षा र विपिनले भने पहिलोपटक एकसाथ काम गरेका हुन् ।

निर्देशक दीपेन्द्र लामाका अनुसार फिल्मको यतिबेला धमाधम पोस्ट प्रोडक्सनको काम भइरहेको छ । आरोही इन्टरटेनमेन्टको ब्यानरमा निर्माण भएको फिल्मका कार्यकारी निर्माता श्रीधर पौडेल हुन् भने मणिकर्ण केसी निर्माता हुन् । चलचित्रले डिग्री भ्याएर गाइपालनमा लागेका एक युवकको कथा भन्छ । फिल्मको कथालाई सामीप्यराज तिमल्सिनाले लेखेका हुन् ।

चलचित्रको अधिंकाश भाग काठमाडौंको टोखा क्षेत्रमा छायांकन गरिएको निर्माण टिमले जनाएको छ ।