फिल्म ‘गोपी’ ले पहिलो गीत सार्वजनिक गर्‍यो (भिडियो)

काठमाडौं ।  चलचित्र ‘गोपी’ निर्माण युनिटले पहिलो कोशेली स्वरुप ‘लक्ष्मी कहिले काली’ बोलको गीत सार्वजनिक गरेको छ । गीतलाई साहित्यकार बुद्धिसागरले शब्दमा उतारेका हुन् भने अर्जुन पोखरेलले आफ्ना बुबा बाबुराम पोखरेलसँगको सहकार्यकमा गीत कम्पोज गरेका हुन् ।

बजारमा चलेकोभन्दा केही फरक शैलीको गीत सार्वजनिक भएको हो ।

आरोही केसीले निर्माण गरेको यो सिनेमालाई दीपेन्द्र लामाले निर्देशन गरेका हुन् भने सामीप्यराज तिमिल्सिनाले फिल्मको कथा लेखेका हुन् ।

विपिन कार्की, वर्षा राउत, अंकित खड्का, भोला सापकोटा लगायतले नृत्य गरेका छन् । वरिष्ठ नृत्यनिर्देशक गोविन्द राईले यही गीतमार्फत् लामो समयपछि औपचारिक रूपमा कोरियोग्राफीमा कमब्याक गरेका छन् । गीतमा राईले तीनवटा भजनटोली, सयजना भन्दा बढी वृद्धवृद्धा र ३२ जना नृत्य कलाकारलाई समावेश गरेको निर्माण टिमले जनाएको छ ।

श्रीधर पौडेल कार्यकारी निर्माता रहेको फिल्ममा शैलेन्द्र डि कार्कीले छायांकन र निमेष श्रेष्ठले सम्पादन गरेका छन् । फिल्ममा सुरक्षा पन्त, प्रकाश घिमिरे, रमेश अधिकारी, सरोज अर्याल, कमलमणि नेपाल, हिउँबाला गौतम लगायतको पनि अभिनय हेर्न पाइनेछ ।