सपना अधुरै रह्यो : रोनाल्डो

काठमाडौं । पोर्चुगलका स्टार क्रिस्टियानो रोनाल्डोले करिअरकै ठूलो सपना साकार पार्न असफल भएको बताएका छन् । कतार विश्वकपको क्वाटरफाइलमा पोर्चुगल मोरक्कोसँग १-० ले पराजित भएसँगै विश्वकपबाट बाहिरिएको थियो ।

रोनाल्डोले आफ्नो सामाजिक सञ्जाल फेसबुकमा लेख्दै पोर्चुगलका लागि विश्वकप जित्ने आफ्नो करिअरको सबैभन्दा ठूलो सपना भएपनि सपना साकार गर्न असफल भएको बताएका हुन् ।

‘मैले धेरै अन्तर्राष्ट्रिय उपाधि जितेँ । तर, आफ्नो देशका लागि विश्वकप जित्ने मेरो सबैभन्दा ठूलो सपना थियो । यसका लागि म धेरै लडेँ । कडा संघर्ष गरेँ । मैले त्यो सपनालाई कहिल्यै छोडिन ।’ उनले भनेका छन्, ‘तर दुःखको कुरा हिजो सपना समाप्त भयो ।’

रोनाल्डो पोर्चुगलबाट सर्वाधिक खेल खेल्ने र सर्वाधिक गोलकर्तासमेत हुन् ।