‘ए’ डिभिजन लिगमा आज तीन खेल हुँदै

काठमाडौं । जारी शहिद स्मारक ‘ए’ डिभिजन लिग फुटबल प्रतियोगिता अन्तर्गत आज तीन खेल हुँदैछ । 

सातदोबाटोस्थित एन्फा कम्प्लेक्सको मैदानमा हुने पहिलो खेलमा उपाधि होडमा रहेको मनाङ मस्याङदी क्लबले जावलाखेल युथ क्लबको सामना गर्दैछ । यि दुई क्लबबीचको खेल बिहान ११ बजेपछि शुरु हुनेछ ।

जारी लिगमा शतप्रतिशत जीत निकालेको मनाङ मस्याङदी विजयी यात्रालाई कायमै राख्ने रणनीतिका साथ मैदानमा उत्रदैछ । 

लिगको शीर्ष स्थानमा रहेको मनाङ मस्याङदी क्लबले ५ खेलबाट १५ अंक बनाएको छ । यता जावलाखेल युथ क्लबको भने ४ अंक सहित लिगको ११ औँ स्थानमा छ । 

आजै हुने अर्को खेलमा हिमालयन शेर्पा क्लब र च्यासल युथ क्लब भिडुदै छन् । उत्कृष्ट प्रर्दशन गर्दै उपाधि होडमा निस्किएको च्यासल क्लबले सोचेअनुरुप प्रर्दशन भने गर्न सकेन । यता हिमालयन शेर्पा क्लबले पनि लिगमा आफ्नो प्रर्दशनलाई सुधार गर्दै आइरहेको छ ।

शेर्पा क्लब १० अंक सहित लिगको छैटो स्थानमा छ । ४ अंक सहित च्यासल युथ क्लब लिगको नवौ स्थानमा छ । 

आजै हुने तेस्रो खेलमा थ्रीस्टार क्लबले सरस्वती युथ क्लबको सामना गर्दैछ । यी दुई क्लबबीचको खेल भने हल्चोकस्थित शसस्त्र प्रहरीको मैदानमा हुनेछ । थ्रीस्टार १२ अंक सहित तालिकाको चौथो स्थानमा छ भने सरस्वती ६ अंक सहित आठौ स्थानमा छ ।