अमेरिकी राष्ट्रपतिको निवासमा छापा, जफत गरियो गोप्य दस्ताबेज

काठमाडौं । अमेरिकी राष्ट्रपति जो बाइडेनको निवासमा अमेरिकी न्याय विभागले छापा मारेर केही महत्वपूर्ण कागजपत्र बरामद गरेको छ ।

बाइडेनको डेलावेरको वेलमिङटनस्थित घरबाट थप छ गोप्य दस्ताबेज अमेरिकी अधिकारीहरूले जफत गरेको समाचार संस्थाहरुले जनाएका छन् । अमेरिकी समाचार च्यानल फक्स न्यूजका अनुसार गोप्य दस्ताबेज जफत गरिएको बाइडेनका रिचर्ड साउबरले पनि पुष्टि गरेका छन् ।

डेलावेर क्षेत्रबाट बाइडेन सन् १९७३ देखि २००९ सम्म सेनिटर भएका थिए । उक्त घरबाट ओबामा कालमा उपराष्ट्रपति हुँदाका २००९ देखि २०१७ सम्मका गोप्य दस्ताबेज पनि भेटिएको बताइएको छ ।

शुक्रवार अमेरिकी न्याय विभागका अधिकारीहरूले १३ घण्टा खानतलासी गरेर गोप्य दस्ताबेज जफत गरेका थिए ।
राष्ट्रपति बाइडेनले उनका वकीलहरुलाई छानबीनमा पूर्ण सहयोग गर्न पनि निर्देशन दिएका छन् ।