के छ विपिन, सुरक्षा र वर्षा अभिनित गोपीको ट्रेलरमा?

काठमाडौं । चलचित्र ‘गोपी’ को ट्रेलर सार्वजनिक गरिएको छ । निर्माण युनिटले काठमाडौंमा विशेष कार्यक्रमको आयोजना गरी फिल्मको ट्रेलर सार्वजनिक गरेको थियो । चलचित्रमा विपिन कार्की, सुरक्षा पन्त र वर्षा शिवाकोटी लगायतका कलाकारको मुख्य भूमिका रहेको छ ।

फिल्ममा विपिन कार्की गाई पाल्ने किसानका रुपमा देखिएका छन् । उनको उद्देश्य धेरैभन्दा धेरै गाई पाल्ने, नेपालमै केही गर्ने सोच बनाएको हुन्छ । तर, नेपालको परिवेशले आन्दोलन गर्नुपर्ने अवस्था आउँछ । फिल्मले एउटा सामान्य किसानको कथालाई फरक तरिकाले उठान गर्न खोजेको छ ।

चलचित्रमा विपिन, सुरक्षा र वर्षाका अलावा अंकित खड्का, भोलाराज सापकोटा, प्रकाश घिमिरे, रमेश अधिकारी, कुन्ति सिमली, हिउँबाला गौतम, सरोज अर्याल, इन्द्रजित चौलागाईं, केशव राई, कमल मणि नेपाल, अपूर्व गौतम, गणेश मुनाल राम बाबु गौतम लगायतको अभिनय रहेको छ । 

आरोही इन्टरटेनमेन्टको ब्यानरमा बनेको फिल्मलाई दिपेन्द्र लामाले निर्देशन गरेका हुन् भने पटकथा सामिप्यराज तिमल्सेनाको रहेको छ । आरोही केसीले निर्माण गरेको यो फिल्ममा कार्यकारी निर्माताका रुपमा श्रीधर पौडेल छन् । फिल्मलाई शैलेन्द्र डि। कार्कीको छायाङ्कन र निमेष श्रेष्ठको सम्पादन रहेको छ । फिल्ममा विप्लव प्रतीक र बुद्धिसागरले लेखेका गीतलाई न्ह्यू बज्राचार्य, अर्जुन पोखरेल र कल्याण सिंहले संगीत भरेका छन् भने शिव परियार, धुर्व विस्को, एन्जिला रेग्मी लगायतको स्वर सुन्न सकिन्छ । 

माघ १८ गतेलाई चलचित्रले रिलिज मिति तोकेको छ ।