एजेन्सी । स्पेनिस ला लिगा फुटबल प्रतियोगिता अन्तर्गत रियल म्याड्रिडले भिल्लारियलसँग बराबरी खेलेको छ ।
बिहीवार राति सम्पन्न भएको १७ औँ चरणको खेलमा रियल म्याड्रिडले भिल्लारियलसँग २-२ गोलको बराबरी खेल्दै समान एक-एक अंक बाडेका छन् । खेल शुरु भएको ४ मिनेट पनि बित्न नपाउँदै भिल्लारियलका लागि कार्जोलाले पहिलो गोल गर्दै क्लबलाई शुरुवाती अग्रता दिलाए ।
कार्जोलाले गोल गरेको तीन मिनेटमा नै रियल म्याड्रिड बराबरी गोल फर्कायो । करिम बेन्जामाले गोल गर्दै खेललाई एक-एक गोलको बराबरीमा ल्याए । त्यस्तै २० औँ मिनेटमा रियलका लागि राफेल भारानेले गोल गर्दै खेललाई २-१ को स्थितीमा ल्याए ।
प्रतिस्पर्धात्मक खेलको ८२ औँ मिनेटमा भिल्लारियलका लागि कार्जोलले गोल गर्दै खेललाई २-२ गोलको बराबरीमा ल्याए । त्यसपछि खेलमा थप गोल भएन र खेल बराबरीमा सकियो । बराबरीपछि रियल म्याड्रिड ३० अंकका साथ लिगको चौथो स्थानमा छ ।
यता भिल्लारियल १६ अंकका साथ १७ औँ स्थानमा छ । लिगको शीर्ष स्थानमा रहेको बार्सिलोनको ३७ अंक छ । बराबरीसंग रियलले शीर्ष स्थानको बार्सिलोना माथि दबाब बढाउने अवसर गुमाएको छ।
रियलले १७ खेलबाट ३० अंक जोडेको छ । रियल शीर्ष स्थानको बार्सिलोना भन्दा अझै ७ अंकले पछाडी छ । भिल्ला रियल १६ अंक सहित रेलिगेशन जोनबाट माथि उठेको छ ।
यो खबर पढेर तपाईलाई कस्तो महसुस भयो ?
प्रतिक्रिया