काठमाडौं । नेपालमा कमै मात्र कलाकार छन्, जो आफूले अभिनय गरेको फिल्मका लागि निकै समय खर्चिन्छन् । एकाध फिल्मका कार्यक्रम बाहेक कलाकारलाई भेट्न पनि मुस्किल पर्छ ।
कलाकारको व्यस्तता भन्दा पनि समय मिलाउन नसकेकाले प्रचारका लागि समय नदिने गुनासो निर्माताहरुले गर्ने गर्छन् । आफ्ना फिल्मको खुलेर प्रचार गर्ने र दर्शकसँग नजिक हुन खोज्ने नायिकामा सुरक्षा पन्त भने पर्छिन् । आफूले अभिनय गरेका प्रायः फिल्मको प्रचारमा सुरक्षाले समय दिएकी हुन्छिन् । त्यसपछि भने उनी आफ्नो पढाइदेखि अरु कुरामा फोकस हुन्छिन् ।
यतिबेला उनी फिल्म ‘गोपी’ को प्रचारमा खुलेर लागेकी छिन् । फिल्मलाई लिएर हुने कार्यक्रममा समेत उनको उपस्थिति देखिन्छ । फिल्म ‘गोपी’ अन्य फिल्मको तुलनामा केही फरक भएको र यस्ता फिल्म खेल्न आफूलाई अझ बढी रुची भएको बताउने सुरक्षाले फिल्मको प्रचारलाई दिएको समयलाई दर्शकले पनि सकारात्मक रुपमा लिएका छन् ।
यसरी आफूले अभिनय गरेको फिल्मका बारेमा खटिनु फिल्मका लागि मात्र नभएर उनका लागि पनि फाइदाकै कुरा हो । यो कुरा अरु कलाकारले पनि बुझ्नुपर्ने हो कि?
सुरक्षा अभिनित गोपी चाहिँ आउँदो माघ १८ गतेदेखि प्रदर्शन हुँदैछ । यो फिल्ममा सुरक्षाका अलावा विपिन कार्की, वर्षा राउत लगायतले पनि अभिनय गरेका छन् । साथै फिल्मलाई सामीप्यराज तिमल्सिनाले लेखेका हुन् भने दीपेन्द्र लामाले निर्देशन गरेका हुन् ।
यो खबर पढेर तपाईलाई कस्तो महसुस भयो ?
प्रतिक्रिया