कोपा डेल रे फुटबलमा रियल म्याड्रिडद्वारा जिरोना स्तब्ध

एजेन्सी । रियल म्याड्रिडले जारी स्पेनिस कोपा डेल रे फुटबल अन्तर्गत क्वाटरफाइनलको पहिलो लेगको खेलमा जित हात पारेको छ । 

घरेलु मैदान सान्टियागो बर्नाबिउमा बिहिबार राति सम्पन्न भएको खेलमा रियल म्याड्रिडले जिरोनालाई ४-२ गोल अन्तरले पराजित गरेको हो । रियल म्याड्रिडलाई जित दिलाउन कप्तान सर्जियो रामोसले २ गोल गरे ।

उनले खेलको ४२ औँ र ७७ औँ मिनेटमा दुई गोल गरे । त्यस्तै लुकास भास्क्वेज र करिम बेन्जिमाले समान एक-एक गोल गरे । यता जिरोनाका लागि एन्थोनी लोजानो र एलेक्स ग्रानेलले समान एक-एक गोल गरेपनि त्यो जितको लागि प्रयाप्त भएन् ।

यो जितपछि रियल म्याड्रिडले सेमिफाइनलमा प्रवेश गर्ने सम्भावनालाई बलियो बनाएको छ । अब यी दुई क्लबबीचको दोस्रो लेगको खेल जिरोनाको मैदानमा हुनेछ ।