नवलपरासी । पश्चिम नवलपरासीको सदरमुकाम परासीमा खेलाडीलाई लक्षित गरी पहिलो पटक सुविधायुक्त ब्याडमिन्टन कभर्डहल निमार्ण पूरा भएको छ ।
उक्त कभर्डहल तीन कठ्ठा क्षेत्रफल जग्गामा निर्माण भएको हो । पाँच वर्षअघि राष्ट्रिय खेलकूद परिषद्को करीब ३० लाख बजेटमा मिनी कभर्डहलको रूपमा निर्माण भएको थियो ।
हाल खेलाडीको सक्रियता बढेपछि पूर्ण आकारसहित व्यवस्थित कभर्डहल निमार्ण गरिएको हो । परासी बजारमा पहिलो कभर्डहल निर्माण भएपछि यहाँका खेलाडी ब्याडमिन्टन खेलप्रति आकर्षित भएका छन् । कभर्डहल नहुँदा खुला स्थानमा खेल्दै आएका खेलाडी अहिले बिहान र साँझ कभर्डहलमा खेल्दै आएका छन् ।
स्थानीय खेलाडीको सक्रियतामा रामग्राम नगरपालिका, जिल्ला समन्वय समिति, जिल्ला खेलकूद विकास समिति, विभिन्न सङ्घ संस्था, स्थानीय उद्योगी, शुभचिन्तक तथा खेलाडी आफैँले पनि रकम उठाएर ८५ लाखको लागतमा कभर्डहल बनाउन सफल भएको रामग्राम ब्याडमिन्टन क्लब नवलपरासीका अध्यक्ष मेघराज गौतमले जानकारी दिए ।
कभर्डहलको सोही क्लबले व्यवस्थापन गर्दै आएको छ । कभर्डहल तयार भएपछि दिनप्रतिदिन नवआगन्तुक खेलाडी पनि ब्याडमिन्टन खेलमा आकर्षित भएको गौतमले बताए । उनका अनुसार शुरुमा १५ खेलाडी रहेकामा अहिले दैनिक एक सय खेलाडी खेल्ने गरेका छन् । क्लबमा ४७ खेलाडी आजीवन सदस्य छन् ।
खेलाडी आफैँले मासिक रकम सङ्कलन गरी कभर्डहलको व्यवस्थापन गर्दै आएका छन् । कभर्डहलमा अहिले तीन कोर्ट निर्माण भएका छन् भने दुईमा काठको प्रयोग गरी पार्केटिङ गरिएको छ ।
कभर्डहल निर्माणका लागि समाजसेवी ध्रुवबहादुर प्रधानले एक कठ्ठा जग्गा प्रदान गरेका थिए भने खेलाडीलाई हौसला बढाउन व्यायामका सामग्रीसमेत क्लबलाई सहयोग गरेका थिए ।
यो खबर पढेर तपाईलाई कस्तो महसुस भयो ?
प्रतिक्रिया