४२ करोडभन्दा बढी विकासे बजेट ‘फ्रिज’

दार्चुला । दार्चुलाका नौ स्थानीय तहको ४२ करोडभन्दा बढी विकासे बजेट ‘फ्रिज’ भएको छ । कोष तथा लेखा नियन्त्रक कार्यालयका अनुसार जिल्लाका नौवटै स्थानीय तहमा सङ्घ र प्रदेशबाट प्राप्त विकासे बजेटमध्ये रु ४२ करोड १४ लाख ३१ हजार चार सय ६४ रुपैयाँ ‘फ्रिज’ भएको हो ।

सङ्घीय सरकारबाट ससर्त अनुदान, समपूरक अनुदान र विशेष अनुदान शीर्षकबाट प्राप्त रकम र प्रदेश सरकारबाट समपूरक अनुदान र विशेष अनुदान शीर्षकबाट प्राप्त विकासे बजेटको रु तीन अर्ब ५७ करोड ९४ लाख ३० हजार छ सय ३४ रुपैयाँमध्ये रु४२ करोड १४ लाख ३१ हजार चार सय ६४ फिर्ता गएको कोष तथा लेखा नियन्त्रक जगन्नाथ भट्टले जानकारी दिए।

जिल्लाको शैल्यशिखर नगरपालिकामा सङ्घीय सरकारबाट प्राप्त रु४९ करोड ८३ लाख एक हजार तथा प्रदेश सरकारबाट प्राप्त रु दुई करोड १० लाख ७२ हजारमध्ये रु आठ करोड १८ लाख १७ हजार आठ सय ५३ विकासे बजेट पनि फिर्ता गएको छ ।

यस्तै महाकाली नगरपालिकामा सङ्घीय र प्रदेश सरकारबाट प्राप्त कूल विकासे बजेट रु ५१ करोड ८२ लाख ३२ हजार पाँच सय ७४ मध्ये रु पाँच करोड ८८ लाख ८३ हजार एक सय ४५ रुपैयाँ फिर्ता गएको छ छ । ब्याँस गाउँपालिकाका लागि प्राप्त रु ३५ करोड ९५ लाख १८ हजारमध्ये रु करोड २६ लाख ८३ हजार पाँच सय ८१ फिर्ता गएको छ भने नौगाड गाउँपालिकालाई प्राप्त रु ३७ करोड ४१ लख ४३ हजार सात सय ६०मध्ये रु दुई करोड ७८ लाख दुई हजार आठ सय ९५ खर्च हुन नसकी फिर्ता गएको छ । यसैगरी मार्मा गाउँपालिकालाई प्राप्त रु ३८ करोड ९७ लाख ३२ हजार नौ सयमध्ये रु तीन करोड ३७ लाख ४२ हजार सात सय ७३ फिर्ता गएको कोष तथा लेखा नियन्त्रक भट्टले बताए ।

जिल्लाको दुहुँ गाउँपालिकाका लागि प्राप्त रु ३० करोड ९७ लाख ७० हजार पाँच सयमध्ये रु चार करोड ६८ लाख ९५ हजार तीन सय ६५ फिर्ता गएकोे छ भने अपी हिमाल गाउँपालिकाका लागि प्राप्त रु २६ करोड ३५ लाख ७३ हजार दुई सयमध्ये रु तीन करोड दुई लाख छ हजार चार सय ३० फिर्ता गएको छ । लेकम गाउँपालिकाका लागि प्राप्त रु ३५ करोड ९४ लाख ४९ मध्ये रु चार करोड ५८ लाख ९३ हजार पाँच सय २७ फिर्ता गएको छ ।

विकासे बजेट रकम फिर्ता जानुमा समयमै निकासा नआउनु, योजनाहरु कार्यान्वयन नहुनुलगायत कारणहरु रहेको शैल्यशिखर नगरपालिकाका प्रमुख प्रशासकीय अधिकृत सुरेन्द्र बिष्टले बताए ।