फिल्म ‘ओ माई गड २’ बिना कुनै कटौती सेन्सर बोर्डबाट पारित, अगष्ट ११ मा रिलिज हुने

काठमाडौं । अक्षय कुमार यतिबेला आफ्नो आगामी फिल्म ‘ओ माई गड २’ लाई लिएर चर्चामा छन् । हालै सामाजिक सञ्जालमा यस फिल्मको टिजर सार्वजनिक भएको छ, जसलाई फ्यानहरुले निकैमन पराएका छन् ।

तर यसको टिजरमा रेलवे ट्र्याकको छेउमा पानीले भगवान शिवको अभिषेक गरिँदैछ, यो दृश्यलाई लिएर फ्यानहरुले चर्को आलोचना गरेका छन्। यसबाहेक अन्य धेरै कारणले सेन्सर बोर्डले यस फिल्मका धेरै दृश्यमा कैँची चलाउने बताइएको थियो तर त्यस्तो भने भएको छैन ।

ओ माई गड २ विगत केही हप्तादेखि फिल्मले सेन्ट्रल बोर्ड अफ फिल्म सर्टिफिकेशनको सामना गरिरहेको समाचारहरु बाहिरिएका थिए ।

अधिकारीहरुसँगको धेरै छलफलपछि फिल्मले अन्ततः सेन्सर बोर्डबाट प्रमाणपत्र पाएको छ । अक्षय कुमार, पंकज त्रिपाठी र यामी गौतम अभिनित अमित राई निर्देशित फिल्मलाई २ घण्टा ३६ मिनेटको स्वीकृत रनटाइमको साथ ‘ए – एडल्ट्स ओनली’ प्रमाणपत्र दिइएको छ ।

फिल्म अगष्ट ११ मा थिएटरहरूमा रिलिज हुनेछ। चलचित्रको ट्रेलर पनि दुई दिनमा रिलिज हुने बताइएको छ ।