वरिष्ठ कलाकार सानु ताम्राकारको उपचारको क्रममा निधन

काठमाडौं । वरिष्ठ कलाकार सानु ताम्राकारको उपचारको क्रममा निधन भएको छ ।

७४ वर्षीय ताम्राकारको आज (शनीबार)  निधन भएको हो ।

केही समयअघि छोरा गुमाएका ताम्राकारको शनिबार करिब ३ बजे उपचारको क्रममा नर्भिक अस्पतालमा निधन भएको चलचित्र कलाकार संघका अध्यक्ष मोहन निरौलाले जानकारी दिए।

गत असारमा छोरा सारुक घरमा मृत फेला परेपछि सानु ताम्राकारको स्वास्थ्य अवस्था बिग्रिदै गएपछि उनी साउनको दोस्रो हप्ता नर्भिक अस्पतालमा भर्ना भएका थिए । आईसीयूमा भर्ना भएका ताम्राकारको पछिल्लो समय किड्नीमा समेत समस्या देखिएको अध्यक्ष निरौलाले बताए ।

वरिष्ठ कलाकार ताम्राकारको भोलि अन्त्येष्टि गर्ने तयारी गरिएको उनले बताए ।

तीन वर्ष चलचित्र कलाकार संघको कार्यवाहक अध्यक्षसमेत बनेका ताम्राकारले थुप्रै चलचित्र तथा सिरियलमा अभिनय गरेका थिए । उनले ‘जीवन रेखा, बदलिँदो आकाश, निरमोही, जुन तारा, सुरक्षा, रगत, ज्वालामुखी, जीवन मृत्यु, मन मनै मन पराए, अभियान, पल, ग्याम्लर, भूँइमान्छे, मेरी मामु’ लगायतका चलचित्रमा काम गरेका छन् ।