काठमाडौं । इजरायली प्रधानमन्त्री बेन्जामिन नेतान्याहुले युद्धविरामको क्रममा गाजाको भ्रमण गरेका छन् । इजरायल र हमासबीच चार दिने युद्धविराम चलिरहेको बेला नेतान्याहुले यो भ्रमण गरेका हुन् । दुई दशकमा गाजा भ्रमण गर्ने उनी पहिलो इजरायली प्रधानमन्त्री हुन् ।
गाजा भ्रमणका बेला नेतान्याहुले सैनिकहरूलाई भेटे र उनीहरूलाई प्रोत्साहन दिएका थिए । उनले अन्तिमसम्म संघर्ष जारी राख्ने प्रतिवद्धता व्यक्त गरेको जनाइएको छ । नेतान्याहुले कमाण्डर र सैनिकहरूबाट सुरक्षा ब्रीफिङ लिएर गाजाको सुरुङको पनि अबलोकन गरेका थिए ।
सैनिकलाई भेट्न पुगेका नेतान्याहुले हेलमेट र बुलेटप्रुफ ज्याकेट लगाएका थिए । सिपाहीसँगै उभिएर उनले भने, ‘हामी हाम्रा कैदीहरूलाई फिर्ता ल्याउन हरसम्भव प्रयास गर्नेछौं र अन्ततः सबैलाई फिर्ता ल्याउँछौं ।’
यो युद्धमा हाम्रा तीनवटा लक्ष्य छन् । सबै बन्धकहरूको फिर्ता, हमासको विनाश, र गाजाले इजरायललाई फेरि कहिल्यै खतरा नपार्ने कुरा सुनिश्चित गर्ने उनले बताए । ‘हामीलाई कसैले रोक्न सक्दैन । हामीसँग बल छ र हामी हाम्रो लक्ष्य हासिल गर्नेछौं’ नेतान्याहुले भने ।
इजरायल सन् २००५ मा गाजाबाट एकपक्षीय रूपमा फिर्ता भएको थियो । २१ वटा बस्ती ध्वस्त पारेर यस क्षेत्रको नियन्त्रण प्यालेस्टिनी प्राधिकरणलाई सुम्पियो । हमासले २००७ मा एक रक्तपातपूर्ण कू द्वारा गाजा कब्जा गरेको थियो ।
हमासले अक्टोबर ७ मा भएको आक्रमणमा २४० इजरायलीलाई बन्धक बनाएको थियो । इजरायलले यी मध्ये ५० जनालाई मुक्त गर्ने सम्झौता गरेको छ । सम्झौता अन्तर्गत, इजरायलले ५० बन्धकहरूको सट्टामा चार दिनको युद्धविराम गरेको थियो ।
यदि यो सम्झौता अगाडि नबढेमा सोमबार मध्यरातमा समाप्त हुनेछ । यस युद्धविरामको समयमा, इजरायली रक्षा बल गाजामा नै थियो ।
यो खबर पढेर तपाईलाई कस्तो महसुस भयो ?
प्रतिक्रिया