एथ्लेटिको मड्रिडमाथि जिरोनाको रोमाञ्चक जित

काठमाडौं । स्पेनिस ला लिगा फुटबलमा जिरोनाले एथ्लेटिको मड्रिडमाथि ४–३ को नाटकीय जित निकालेको छ । जितसँगै जिरोनाले शीर्ष स्थानमा रहेको रियल मड्रिडसँग अंक बराबरी गर्दै दोस्रो स्थानमा यथावत रहेको छ । दुवै टिमको समान ४८ अंक रहेको छ । पराजित भएको एथ्लेटिको मड्रिड भने ३८ अंकका साथ तालिकाको तेस्रो स्थानमा रहेको छ ।

बुधवार राति जिरोनाले एथ्लेटिको मड्रिडमाथि सुरुदेखि नै दबाब बनाएको थियो । वालेरी फर्नान्डीजले दोस्रो मिनेटमा गोल गर्दै जिरोनालाई अग्रता दिलाएका थिए । १४औं मिनेटमा अल्भारो मोराटाले गोल गरेपछि एथ्लेटिको मड्रिडले खेल बराबरी गरेको थियो ।

२६औं मिनेटमा साभियो मुरेराले गोल गर्दै जिरोनलाई २–१ ले अघि बढाएका थिए । ३९औं मिनेटमा डेली ब्लाइन्डले गोल गरेपछि ३–१ को अवस्थामा पुगेको थियो ।४४औं मिनेटमा एथ्लेटिको मड्रिडका लागि अल्भारो मोराटाले गोल गर्दै अन्तर ३–२ मा ल्याएका थिए । ५४औं मिनेटमा मोराटाले ह्याट्रिक गर्दै खेल ३–३ को बराबरीमा आएको थियो । तर, दोस्रो हाफको अतिरिक्त पहिलो मिनेटमा इभान मार्टिनले गोल गरेपछि जिरोना ४–३ को जित निकाल्न सफल भयो ।