बाँके । आठौँ राष्ट्रिय खेलकुद प्रतियोगितालाई लक्षित गरी बाँकेमा ४८ करोडको लगानीमा अत्याधुनिक सुविधासम्पन्न खेलकुद पूर्वाधार निर्माण भएका छन् ।
नेपालगञ्जमा अत्याधुनिक र सुविधासम्पन्न फुटबल मैदान, पौडीपोखरी, कभर्डहल, भारोत्तोलन एकेडेमी, सुटिङ रेन्ज, एथलेटिक्स ट्रयाक र जुडो हल निर्माण भएका छन् भने, बाँकेकै कोहलपुरमा अन्तर्राष्ट्रिय क्रिकेट मैदान र खजुरामा भलिबल रङ्गशाला निर्माण भएका छन् ।
बाँकेमा सबैभन्दा ठूलो लगानीमा नेपालगञ्ज रङ्गशाला निर्माण भएको छ । रङ्गशालाका लागि मात्रै २४ करोड बजेट उपलब्ध भएको छ । ६ करोड लागतमा फुटबल मैदान र १८ करोडमा भीआइपी प्यारापिट निर्माण भइरहेको मध्यपश्चिम क्षेत्रीय खेलकुद विकास समिति प्रदेश नं ५ का अध्यक्ष भीम वलीले बताए ।
उनका अनुसार, नेपालगञ्ज रङ्गशालामा खेल्न योग्य मैदानका लागि ३६ लाखको बरमुडा दुबो रोपिएको छ । यसले फुटबल मैदान अन्तर्राष्ट्रिय मापदण्डको बनेको छ । रङ्गशाला परिसरमा फुटबल मैदानबाहेक करोडौँको लगानीमा पौडीपोखरी, सुटिङ रेञ्ज, भारोत्तोलन एकेडेमी निर्माण कार्य भएको छ ।
१४ करोड २८ लाख बजेटमा रङ्गशाला छेउमा पौडी पोखरी निर्माण भएको छ । त्यसैगरी रु एक करोड ५० लाखको लगानीमा सुटिङ रेञ्ज तयारी अवस्थामा पुगेको छ ।
नेपालगञ्जकै कारकाँदोमा दुई करोडमा जुडो एकेडेमी निर्माण भएको छ । आठौँ राष्ट्रिय खेलकुद प्रतियोगितालाई लक्षित गरी बाँकेको खजुरा सीतापुरमा दुई करोड ५० लाखको लगानीमा भलिबल रङ्गशाला निर्माण भएको छ ।
यसैगरी कोहलपुरमा एक करोड ५० लाखको लगानीमा क्रिकेट खेलमैदान तयार भएको छ ।
यही मैदानमा आज ‘बुधवार’देखि आठौँ राष्ट्रिय खेलकूद प्रतियोगिताअन्तर्गत क्रिकेट खेल भएको छ । राष्ट्रिय खेलकुद परिषद् ‘राखेप’ का सदस्य सचिव केशवकुमार विष्टले आठौँ राष्ट्रिय खेलकूद प्रतियोगितालाई लक्षित गरेर निर्माणाधीन खेलकुद पूर्वाधारमा नेपालको खेलकूद इतिहासमै सबैभन्दा धेरै लगानी भएको बताए ।
सदस्यसचिव विष्टले नेपालगञ्जको इतिहासमै यति ठूलो लगानीमा पहिलोपटक प्रतियोगिता हुन लागेको प्रतिक्रिया दिए । उनले निर्माणाधीन भौतिक पूर्वाधारको निर्माणकार्य अधिकांश सकिएको बताए ।
यसैबीच यो प्रतियोगिताको औपचारिक उद्घाटन आज ‘बिहीवार’ हुँदैछ । आठौँ राष्ट्रिय खेलकुदको राष्ट्रपति विद्यादेवी भण्डारीले नेपालगञ्ज रंगशालामा एक भब्य कार्यक्रमकाबीच प्रतियोगिताको औपचारिक उद्घाटन गर्दै छिन् ।
आयोजक राष्ट्रिय खेलकुद परिषद्ले आज साँझ ५ बजेर ३० मिनेटमा राष्ट्रपतिबाट प्रतियोगिताको भब्य उद्घाटन गरिने जनाएको छ । बैशाख ५ गते औपचारिक उद्घाटन भनिएपनि प्रतियोगिताको अधिकांश खेल चैत २७ गतेबाट नै शुरु भइसकेका छन् ।
बैशाख ५ देखी ११ गते सम्म औपचारिक रुपमा सञ्चालन हुने प्रतियोगिताको समापन प्रधानमन्त्री केपी शर्मा ओलीले गर्ने कार्यक्रम निर्धारण गरिएको छ ।
रङ्गशाला बेलझुण्डीमा, खेल घोराहीमा
आठौँ राष्ट्रिय खेलकूदका लागि दाङको बेलझुण्डीमा रङ्गशाला निर्माण भएको भए पनि खेल भने घोराहीमा हुने भएको छ ।
समयमै निर्माणकार्य पूरा नभएपछि राष्ट्रिय खेलअन्तर्गत महिला फुटबल प्रतियोगिता घोराहीको भरतपुर मैदानमा हुने भएको हो । राखेपले बेलझुण्डी रङ्गशालामा महिला फुटबल प्रतियोगिताको अन्तिम खेल खेलाउने भनी संरचना निर्माण गरे पनि निर्धारित समयसम्म काम पूरा नभएपछि महिला फुटबलका केही खेल घोराहीमा हुनेछन् भने केही बेलझुण्डीमा हुने भएका छन् ।
बुधवारदेखि राष्ट्रिय खेलकूदअन्तर्गत महिला फुटबल प्रतियोगिता दाङमा शुरु भएको छ । लिगका खेल घोराही र कपिलवस्तुमा हुने भए पनि सेमिफाइनल र फाइनलका खेल भने बेलझुण्डी रङ्गशालामै हुने दाङ जिल्ला खेलकूद विकास समितिका अध्यक्ष डिल्ली डाँगीले बताए ।
अर्कोतर्फ बेलझुण्डी रङ्गशालामा एथ्लेटिक्सका खेल हुने भएकाले पनि एकैपटक दुई खेल खेलाउन नमिल्ने भएकाले घोराहीमा फुटबल खेल खेलाउन लागिएको उनले बताए । ‘बेलझुण्डी रङ्गशालामा एथलेटिक्स खेल पनि हुन्छ, त्यसैले हामीले बेलझुण्डीमा एथलेटिक्स खेल खेलाउने छौँ’, उनले भने, ‘फाइनल र सेमिफाइनलको खेल भने बेलझुण्डीमै हुनेछन् ।’
उनका अनुसार यही वैशाख ७ देखि ११ गतेसम्म हुने सेमीफाइनल र फाइनलका खेल उक्त रङ्गशालामै हुनेछन् । साथै बिहान घोराहीमा खेल हुने र साँझ बेलझुण्डीमै हुने गरी खेल तालिका बनाइएको समेत उनले बताए । बेलझुण्डी रङ्गशाला निर्माणको काम अझै पूरा हुनसकेको छैन ।
फुटबल र एथलेटिक्स खेलका लागि मात्रै संचरना निर्माण भएको भए पनि अन्य संरचना निर्माणको काम भने खेलपछि मात्रै पूरा गर्ने योजना रहेको निर्माण कम्पनीका प्रतिनिधिले बताए । बुधवार राष्ट्रिय खेलअन्तर्गत तीन खेल भएका छन् ।
यसअघि दाङको घोराहीमा भएको टेबलटेनिस खेल पूरा भइसकेको छ भने बास्केटबल चलिरहेको छ । त्यस्तै आज ‘बिहीवार’देखि कराँते, एथलेटिक्सका खेल शुरु हुनेछन् ।
यो खबर पढेर तपाईलाई कस्तो महसुस भयो ?
प्रतिक्रिया