युभेन्ट्सले जित्यो सिरी ‘ए’को उपाधि

एजेन्सी । युभेन्ट्सले यो सिजनको इटालियन लिग सिरी ‘ए’ फुटबलको उपाधि जितेको छ । 

शनिवार राति सम्पन्न भएको ३३ औँ चरणको खेलमा युभेन्ट्सले फिरोरेन्टिनालाई २-१ गोल अन्तरले पराजित गर्दै आठौँ पटक लिगको उपाधि आफ्नो पोल्टामा पारेको हो ।

खेल शुरु भएको ६ मिनेट पनि बित्न नपाउँदै फिरोरेन्टिनाका लागि मिलेनकोभिकले पहिलो गोल गर्दै क्लबलाई शुरुवाती अग्रता दिलाए । तर, ३७ औँ मिनेटमा युभेन्ट्सका लोबो सिल्भाले बराबरी गोल फर्काए ।

प्रतिस्पर्धात्मक बनेको खेलको ५३ औँ मिनेटमा फिरोरेन्टिनाका पेज्जिलाले आत्मघाती गोल गरे । त्यसपछि खेलमा थप गोल भएन र खेल युभेन्ट्सले २-१ गोल अन्तरले जित्यो ।

युभेन्ट्सले लगातार आठ पटक यो प्रतियोगिताको उपाधि जित्दै नयाँ कीर्तिमान समेत बनाएको छ । लिग सकिन भने अझै बाँकी रहेको छ । युभेन्ट्सले ३३ खेलबाट ८७ अंक बनाएको छ । 
दोस्रो स्थानमा रहेको नेपोलीको ६७ अंक छ । 

त्यस्तै शनिवार राति नै भएको एसि मिलान र पार्माबीचको खेल भने एक-एक गोलको बराबरीमा सकिएको छ । इन्टर मिलानले रोमालाई एक-एक गोलको बराबरीमा रोक्यो ।