‘खो गए हम कहाँ’ चलचित्रको टिमलाई दिपिका पादुकोणको बधाई

काठमाडौं । हालै मात्र रिलिज भएको अभिनेत्री अनन्या पाण्डेद्वारा अभिनित चलचित्र ‘खो गए हम कहाँ’ ले निकै सफलता बटुलिरहको छ ।

चलचित्रसँगै अभिनेत्री अनन्या पाण्डेको अभियनलाई पनि दर्शकहरुले मनपराइरहेका छन् । सामाजिक सञ्जालको दुनियाँबाट टाढा राखेर आफुलाई खोज्न चाहाने तीन जना साथीहरुकोे कथामा आधारित यस चलचित्रमा अनन्या पाण्डे, सिद्धार्थ चर्तुर्वेदी र आदर्श गौरव लगायतका कलाकारहरुको मुख्य भूमिका रहेको छ । चलचित्रका कलाकारहरु चलचित्रको सफलतामा रमाइरहेका छन् । बलिउडका चर्चित कलाकारहरुले समेत यस चलचित्रको तारीफ गरिरहेका छन् । यसै क्रममा चर्चित अभिनेत्री दिपिका पादुकोणले पनि चलचित्रको सफलताको लागि बधाई तथा शुभकामना दिएकी छिन् ।

दिपिकाले चलचित्रको पूरै टिमलाई नै बधाई दिएकी हुन् । दिपिकाले शकुन बत्राको चलचित्र ‘गहिराई’ मा अनन्या पाण्डे र सिद्धार्थ चतुर्वेदीसँग काम गरेकी छिन् । दिपिकाले सामाजिक सञ्जालमा पोष्ट सार्वजनिक गर्दै लेखेकी छिन्, ‘एउटा अर्को पनि बधाई साथीहरु’ लेख्दै उनले फिल्मको स्टार कास्ट, निर्देशक र प्रोडक्सन हाउसको इन्स्टाग्राम ह्यान्डलमा ट्याग गर्दै सेतो हार्ट इमोजी पनि सेयर गरेकी छिन् ।

मंगलबार राति मुम्बाईमा फिल्म ‘खो गए हम कहाँ’ को सफलताको पार्टी आयोजन गरिएको थियो । पार्टीमा बलिउडका चर्चित कलाकारहरुको सहभागिता रहेको थियो । चलचित्रका मुख्य कलाकार अनन्या पाण्डे, सिद्धार्थ चर्तुर्वेदी र आदर्श गौरवले दर्शकहरुबाट राम्रो प्रतिक्रिया पाइरहेका छन् । तीनै जना कलाकारहरु चलचित्रको सफलतामा निकै खुसी देखिन्छन् ।

चलचित्रमा तीन जना साथीहरु आहना, इमाद र नीलको वरिपरिको घटनालाई चलचित्रमा समेटिएको छ । आजको डिजिटल युगको दुनियाँमा प्रेम , मित्रता र आपसी सम्बन्धमा सामाजिक सञ्जाल कसरी हावी भइरहेको छ भन्ने कुरा देखाउन खोजिएको छ । अभिनेत्री अनन्या पाण्डेले चलचित्रमा ‘आहना’ को भूमिका निर्वाह गरेकी छिन् ।

यी दिनहरुमा दिपिका पादुकोण पनि आफ्नो बहुप्रतिक्षित फिल्म ‘फाइटर’ को कारण चर्चामा छिन् । ‘फाइटर’ मा उनीसँग ऋतिक रोशन र अनिकल कपूर पनि मुख्य भूमिकामा देखिएका छन् । यो चलचित्र २५ जनवरी गणतन्त्रको दिवसको दिन रिलिज हुँदैछ ।