माइतीघरको निषेधाज्ञा हटाउन माग गर्दै नेविसंघको प्रदर्शन तस्बिरसहित)

काठमाडौं । नेपाल विद्यार्थी संघको केन्द्रीय तदर्थ समितिले माइतीघर मण्डलाको निषेधाज्ञा खारेजीको माग गर्दै प्रदर्शन गरेको छ।

मंगलबार दिउँसो नेविसंघले निषेधाज्ञा संविधान, विधमान कानुन र सर्वोच्चको व्याख्या विपरीत भएको भन्दै माइतीघर को निषेधाज्ञा तत्काल खारेज गर्न माग गरेको छ।

‘लोकतन्त्रमा सिभिक स्पेस सङ्कुचन हुन्न, लोकतन्त्रमा अभिव्यक्ति स्वतन्त्रता निषेध हुन्न । माइतीघर मण्डलास्थान मात्रै हैन, अभिव्यक्ति स्वतन्त्रता र सिभिक स्पेसको प्रतिक पनि हो। संविधानको मर्म र कानून विपरीत माइतीघर मण्डलामा भएको निषेधाज्ञा तत्काल खारेज गर्न माग गर्दछौं।’ नेविसंघले भनेको छ।

‘शान्तिपूर्ण भेला तथा प्रदर्शन गर्न पाउने नागरिकको संवैधानिक र मौलिक अधिकार हो। जनआन्दोलनको बलमा लोकतान्त्रिक गणतन्त्रको स्थापना भएपछि पीडित, नागरिक समाज तथा राजनीतिक पार्टीले स्वेच्छाचारीतन्त्रका विरुद्ध एवं न्यायका पक्षमा आवाज उठाउने साझा थलोका रूपमा ‘माइतीघर मण्डला’ रहँदै आएको छ। त्यसकारण यसको निशेधाज्ञा तत्काल खारेज गरिनुपर्छ ।’ नेविसंघ केन्द्रीय सदस्य विजय ढुंगानाले बताए।

विरोध प्रदर्शनको अभ्यास गरिँदै आएको र अभ्यस्त समेत भइसकेको ठाउँ माइतिघर मण्डलामा समेत प्रदर्शन तथा विरोधका कार्यक्रम गर्न नपाउने गरी निषेधित क्षेत्र तोकिने अभ्यासले विचार तथा अभिव्यक्ति स्वतन्त्रता संकुचन गरेको नेविसंघका अर्का केन्द्रीय सदस्य पवन आचार्यले बताए ।

त्यस्तै वर्तमान गठबन्धन सरकारमा रहेका दलहरुले समेत गैरसंवैधानिक ढंगबाट संसद विघटन हुँदा सडकमा आएर सरकारको ध्यानाकर्षण गराएको स्मरण गर्दै त्यसलाई भुुलेर राजनीतिक दलहरुले आफ्नो असली चरित्र देखाएको अर्का केन्द्रीय सदस्य सुवास पौडेलले बताए ।

‘वर्तमान गठबन्धन सरकारमा रहेका दलहरूले समेत गैरसंवैधानिक ढंगबाट संसद् विघटन हुँदा ‘हामी यहाँ छौं’ भनी तत्कालीन सरकारको ध्यानाकर्षण गराउनका लागि यसको उपयोग गरेका थिए । त्यसलाई भुलेर यस क्षेत्रलगायत उपत्यकाका विभिन्न ठाउँमा स्थानीय प्रशासनले निषेधाज्ञा जारी गरेकोमा नेपाल विधार्थि सघं तदर्थ सामिति गम्भिर आपत्ति जनाउदछौ ।’ केन्द्रीय सदस्य पौडेलले भने।

प्रदर्शन कार्यक्रममा नेविसंघ केन्द्रीय सदस्य साथै नेविसंघ काठमाडौंको उपस्थिती समेत रहेको थियो ।

सो क्रममा केहीलाई प्रहरीले पक्राउ समेत गरेको छ ।