विभिन्न स्थानबाट लागुऔषधसहित पाँच जना पक्राउ

काठमाडौं । देशका विभिन्न स्थानबाट लागुऔषधसहित ५ जना पक्राउ परेका छन् । पर्साको वीरगंज महानगरपालिका-१६ भानुचोकबाट अवैध लागुऔषध खैरो हेरोइन जस्तो देखिने पदार्थ करिब १ सय ग्रामसहित सोही ठाउँ बस्ने ६१ वर्षीय राजबली महतो समेत तीन जनालाई शुक्रबार दिउँसो प्रहरीले पक्राउ गरेको हो ।

प्रहरी चौकी बसपार्क र लागुऔषध नियन्त्रण ब्यूरो शाखा कार्यालय वीरगन्जबाट खटिएको प्रहरीले उनीहरूलाई उक्त पदार्थसहित पक्राउ गरेको बताइएको छ । उता बाँकेको नेपालगन्ज उपमहानगरपालिका-१५ जमुनाहबाट अवैध लागुऔषध ब्राउनसुगर जस्तो देखिने पदार्थ करिब २ ग्रामसहित सुर्खेत गुर्भाकोट नगरपालिका-९ बस्ने २१ वर्षीय राज वलीलाई शुक्रबार बेलुकी प्रहरीले पक्राउ गरेको छ । इलाका प्रहरी कार्यालय जमुनाह र लागूऔषध नियन्त्रण ब्यूरो नेपालगंजबाट खटिएको प्रहरीले उनलाई उक्त पदार्थसहित पक्राउ गरेको हो ।

त्यस्तै रौतहटको मौलापुर नगरपालिका-५ चोकबाट नियन्त्रित लागुऔषध नाईट्राभेट २ सय ८९ ट्याब्लेटसहित फतुवा विजयपुर नगरपालिका-८ विजयपुर बस्ने २८ वर्षीय सञ्जय कुमार दासलाई शनिबार बिहान प्रहरीले पक्राउ गरेको छ । इलाका प्रहरी कार्यालय मौलापुरबाट खटिएको प्रहरीले बारा पटेर्वाबाट विजयपुरतर्फ जाँदै गरेको ना.१३ प ४१९२ नम्बरको मोटरसाइकललाई जाँच गर्ने क्रममा मोटरसाइकलमा सवार उनलाई उक्त लागूऔषधसहित पक्राउ गरेको हो । यस सम्बन्धमा प्रहरीले आवश्यक अनुसन्धान गरिरहेको छ ।