फिल्म ‘एनिमल’ ले बनायो कीर्तिमान

काठमाडौं । गत वर्षको डिसेम्बरमा रिलिज भएको रणवीर कपूर अभिनित फिल्म ‘एनिमल’ ले बक्स अफिसमा ठूलो कमाई गरेको थियो ।

कमाईसँगै यो फिल्मले धेरै नयाँ कीर्तिमान पनि बनाएको छ । यस फिल्ममा भएका केही दृश्यमा आपत्ति जनाइएको छ भने विभिन्न आलोचनाहरू भएका छन् । यसका बावजुद पनि चलचित्रले हलहरुमा राम्रो मात्रामा दर्शक बटुलेको थियो । यो फिल्म अहिले ओटीटीमा रिलिज भएको छ र ओटीटीमा पनि दर्शकले माया दर्शाएका छन् ।

ओटीटीमा रिलिज भएको यो फिल्मले रेकर्ड बनाएको छ ।

सन्दीप रेड्डी वाङ्गाद्वारा निर्देशित र रणवीर कपूर, अनिल कपूर, रश्मिका मण्डन, बबी देओल र तृप्ति डिमरी जस्ता कलाकारहरूको अभिनय रहेको फिल्म एनिमल २६ जनवरीमा गणतन्त्र दिवसको अवसरमा नेटफ्लिक्समा रिलिज भएको थियो।

यसको ओटीटी रिलिजलाई लिएर धेरै हंगामा भएको थियो। तर, यो कोलाहलको बीचमा पनि दर्शकले यसलाई राम्रैसँग साथ दिएका छन् । मिडियारिपोर्टका अनुसार ओटीटीमा ‘एनिमल’ रिलिज भएको तीन दिनमै २ करोड ८० लाख घण्टा हेरिएको छ ।

नेटफ्लिक्सको रिपोर्ट अनुसार धेरै भ्युज पाउने सूचीमा एनिमल चौथो नम्बरमा छ। यो फिल्मले ६२ लाख भ्युज पाएको छ अर्थात् करिब ६२ लाख मानिसले यो फिल्म २ करोड ८० लाख घण्टासम्म हेरिसकेका छन् ।

मिडिया रिपोर्टका अनुसार यो फिल्मको भारतमा नेट कलेक्सन ५४७.५६ करोड रहेको छ भने विश्वव्यापी फिल्मले ८९५.४० करोडको व्यापार गरेको छ । हालै फिल्मफेयर अवार्डमा रणवीर कपूरले यस फिल्मका लागि उत्कृष्ट अभिनेताको अवार्ड समेत पाएका थिए । यता दर्शक भने फिल्म ‘एनिमल पार्क’ को सिक्वेलको व्यग्र प्रतिक्षामा छन् ।