छुट्टाछुट्टै सवारी दुर्घटनामा तीन जनाको मृत्यु

काठमाडौं । छुट्टाछुट्टै सवारी दुर्घटनामा तीन जनाको मृत्यु भएको छ ।

सर्लाहीको कौडेना गाउँपालिका-२ फुलपरासीस्थित सडकमा ज.७ प १४३० नम्बरको मोटरसाइकलले साइकललाई ठक्कर दिई सोमबार साँझ दुर्घटना हुँदा मोटरसाइकल चालक गोडैता नगरपालिका-७ जानकी टोल बस्ने ३२ वर्षीय राकेश राउतको मृत्यु भएको हो ।

दुर्घटनामा गम्भीर घाइते भएका उनको प्रादेशिक अस्पताल मलंगवामा उपचारको क्रममा मृत्यु भएको हो । साथै दुर्घटनामा घाइते भएका साइकलमा सवार २ जनाको सोही अस्पतालमा उपचार भइरहेको छ ।

त्यस्तै सल्यानको छत्रेश्वरी गाउँपालिका-१ मैनेस्थित सडकमा ग.३ च ३३१२ नम्बरको जिप अनियन्त्रित भई सोमबार दिउँसो दुर्घटना हुँदा चालक तनहुँ आँबुखैरेनी बस्ने ३५ वर्षीय अर्जुन विकको मृत्यु भएको हो । दुर्घटनामा गम्भीर घाइते भएका उनको जिल्ला अस्पताल सल्यानमा उपचारको क्रममा मृत्यु भएको हो ।

त्यसैगरी मकवानपुरको हेटौडा उपमहानगरपालिका-११ थानाभर्‍याङस्थित सडकमा बा.प्र ०३-००५ प ३८८६ नम्बरको मोटरसाइकलको ठक्करबाट पैदलयात्री हेटौंडा उपमहानगरपालिका-३ बसामाडी बस्ने ४५ वर्षीय राम कुमार खतिवडाको मृत्यु भएको छ । ठक्करबाट गम्भीर घाइते भएका उनको हेटौंडा अस्पतालमा उपचारको क्रममा मृत्यु भएको हो । मोटरसाइकल चालकलाई प्रहरीले नियन्त्रणमा लिएको छ । दुर्घटनाका सम्बन्धमा आवश्यक अनुसन्धान गरिरहेको प्रहरीले जनाएको छ ।