लागुऔषधसहित वीरगन्जबाट ४ जना पक्राउ

वीरगन्ज । पर्सामा लागुऔषधसहित ४ जना पक्राउ परेका छन् । प्रहरी गस्तीको टोलीले फरक फरक ठाउँबाट एकै दिन ४ जनालाई पक्राउ गरेको जनाएको छ ।

पर्साबाट प्रहरीले लागुऔषध खैरो हेरोइनसहित २ जनालाई नियन्त्रणमा लिएको छ । वीरगन्ज महानगरपालिका वडा नम्बर १६ रजतजयन्ती चोकबाट लागुऔषधसहित दुई जनालाई नियन्त्रणमा लिएको हो ।

प्रहरीले रौतहट जिल्ला गुजरा नगरपालिका वडा नम्बर ३ कटानी बस्ने वर्ष ३२ को भीम बहादुर वाइबा र सोही ठाउँका २५ वर्षीय मिलन तामाङलाई पक्राउ गरेको प्रहरी प्रवक्ता कुमार विक्रम थापाले जनाए ।

प्रहरी चौकी ईनर्वाबाट खटिएको चेकिङ टोलीले भारतको रक्सौलबाट वीरगन्जतर्फ आउँदै गरेका सवारीसाधन तथा पैदल यात्रीहरूलाई जाँच गर्दा पक्राउ गरेको हो ।

प्रहरीले उनीहरूको साथबाट प्र २–०३–००८ प १४३४ नम्बरको स्कुटीका चालक भिमले लगाएको हेल्मेटभित्र लुकाई छिपाइ राखिएको लागुऔषध खैरो हिरोइन जस्तो देखिने पदार्थ बरामद भएको प्रवक्ता थापाको भनाइ छ । उनको साथबाट प्लास्टिकबाहेक १२ ग्राम २४० मिलीग्राम लागुऔषध फेला पारेको प्रहरीले जनाएको छ ।

पक्राउ परेकाहरुविरुद्ध लागुऔषध सम्बन्धी कसुरमा आवश्यक अनुसन्धान प्रक्रिया अगाडि बढाइएको छ ।

यसैगरी आजै जिल्ला प्रहरी कार्यालय पर्साबाट खटिएको प्रहरीको टोलीले वीरगन्ज महानगरपालिका–१६ शंकाराचार्य गेट नजिकैबाट लागुऔषधसहित २ जनालाई पक्राउ गरेको जनाएको हो ।

प्रहरी चौकी ईनर्वाबाट खटिएको प्रहरी टोलीले लागुऔषधसहित दुई जना युवकहरूलाई पक्राउ गरेको प्रहरी प्रवक्ता थापाले जनाए ।

पक्राउ पर्नेहरूमा मकवानपुरको हेटौँडा उपमहानगरपालिका–४ बस्ने ३२ वर्षका गणेश घिमिरे र मकवानपुरकै बकैया गाउँपालिका–५ बस्ने ३५ वर्षका विकास भोलन रहेका उनले बताए ।

प्रहरीले गणेशको साथबाट नुरफिन २० एम्पुल, फेनारगन २० एम्पुल, डाइजेपाम २० एम्पुल र बिकासले लगाएको जिन्स पाइन्टको खल्तीमा लुकाईछिपाइ राखिएको लागुऔषध नुरफिन २५ एम्पुल, डाइजेपाम २५ एम्पुल र फेनारगन २५ एम्पुल गरी जम्मा ४५ सेट फेला पारेको जनाएको छ ।