रुसी सेनामा भर्ती भएका थप ७ जनाको मृत्यु

काठमाडौं । रुसी सेनामा भर्ती भएका थप ७ जनाको मृत्यु भएको छ ।

रुसी सेनामा भर्ती भई युक्रेनसँगको युद्धका क्रममा थप ७ जना नेपालीको मृत्यु भएको परराष्ट्र मन्त्रालयले जनाएको छ । ।

मृत्यु हुनेमा धादिङका पूर्णबहादुर गुरुङ, जाजरकोटका नवीन शाही, उदयपुरका पदमबहादुर घिमिरे, झापाका गंगाराम अधिकारी, बाग्लुङका जीतबहादुर बिक, बाँकेका सञ्जय केसी र रसुवाका सुन्दर मोक्तान रहेका छन् ।

परराष्ट्र मन्त्रालयका अनुसार यससँगै सरकारले प्राप्त गरेको औपचारिक तथ्यांकअनुसार रसियामा मृत्यु हुने नेपालीको संख्या १९ पुगेको छ ।

परराष्ट्र मन्त्रालय अन्तर्गतको कन्सुलर विभागमा हालसम्म २०० भन्दा बढीका परिवारले उद्धारका लागि निवेदन दिएका छन् ।