छुट्टाछुट्टै सवारी दुर्घटनामा तीन जनाको मृत्यु

काठमाडौं । छुट्टाछुट्टै सवारी दुर्घटनामा तीन जनाको मृत्यु भएको छ ।

महोत्तरीको रामगोपालपुर नगरपालिका-३ दोलाठीस्थित सडकमा प्र.२-०२-००३ प २३४१ नम्बरको मोटरसाइकललाई हाल नम्बर नखुलेको सवारी साधनले शनिबार राति ठक्कर दिँदा मोटरसाइकल चालक सोही नगरपालिका-८ बिर्ता बस्ने २६ वर्षीय अमित कुमार मण्डलको मृत्यु भएको छ । दुर्घटनामा गम्भीर घाइते भएका उनको प्रादेशिक अस्पताल जलेश्वरमा उपचारको क्रममा मृत्यु भएको हो ।

साथै दुर्घटनामा घाइते भएका मोटरसाइकलमा सवार १ जनालाई उपचारको लागि काव्या अस्पताल जनकपुर पठाइएको छ । प्रहरीले हाल फरार सवारी साधनको खोजी गरिरहेको छ ।

मोरङको पथरी शनिश्चरे नगरपालिका-१ पश्चिम बस स्टेण्डस्थित सडकमा प्रदेश १-०२-०५२ प २२१७ नम्बरको मोटरसाइकलको ठक्करबाट साइकलयात्री सोही नगरपालिका-१० बस्ने ५० वर्षीय प्रेम बहादुर चौहानको मृत्यु भएको छ । ठक्करबाट गम्भीर घाइते भएका उनको नोबेल अस्पताल विराटनगरमा उपचारको क्रममा मृत्यु भएको हो । मोटरसाइकल चालकलाई प्रहरीले नियन्त्रणमा लिएको छ ।

त्यस्तै चितवनको ईच्छाकामना गाउँपालिका-६ जलबिरेस्थित सडकमा रोकी राखेको ना.६ ख ३५८० नम्बरको ट्रकमा ग.१ ख ८५२४ नम्बरको बस ठक्कर खाई गएराति दुर्घटना हुँदा बसमा सवार भारत घर भएकी ३७ वर्षीय गौरी दासको मृत्यु भएको छ । दुर्घटनामा गम्भीर घाइते भएकी उनको उपचारको लागि अस्पतालतर्फ लैजाने क्रममा बाटैमा मृत्यु भएको हो । साथै दुर्घटनामा घाइते भएका ट्रक चालक र बसमा सवार ३ जनालाई उपचारको लागि भरतपुरतर्फ पठाइएको छ । बस चालकलाई प्रहरीले नियन्त्रणमा लिएको छ । दुर्घटनाका सम्बन्धमा थप अनुसन्धान गरिरहेको प्रहरीले जनाएको छ ।