सेरेना फ्रेन्च ओपन टेनिसको दोस्रो चरणमा प्रवेश

एजेन्सी । अमेरिकी सेरेना विलियम्स जारी फ्रेन्च ओपन टेनिसको दोस्रो चरणमा प्रवेश गरेकी छिन् । 

सोमवार राति सम्पन्न भएको महिला एकलतर्फको पहिलो चरणको खेलमा सेरेनाले रसियाकी भिटालिया दियात्चेन्कोलाई २-१ को निक्कै प्रतिस्पर्धात्मक सेटमा पराजित गर्दै अघिल्लो चरणको यात्रा तय गरिन् ।

सेरेना खेलको पहिलो सेटमा भने दियात्चेन्कोसँग २-६ ले पराजित भएकी थिइन् । त्यस्तै दोस्रो सेटमा सेरेनाले ६-१ र अन्तिम सेट ६-० ले आफ्नो पक्षमा पारिन् ।

तीन पटककी च्याम्पियन सेरेनाले अब दोस्रो चरणको खेलमा जापानकी कुरुमी नारा र स्लोभेनियाकी डालिला जाकुपोभिकबीचको विजेतासँग प्रतिस्पर्धा गर्नेछिन् ।