समूह विजेता बन्दै प्रदेश ३ सेमिफाइनलमा प्रवेश

काठमाडौं । प्रदेश नम्बर ३ जारी प्रधानमन्त्री कप एकदिवसीय राष्ट्रिय क्रिकेट प्रतियोगिताको सेमिफाइनलमा प्रवेश गरेको छ ।

मुलपानी क्रिकेट मैदानमा आज ‘सोमवार’ भएको लिग चरणको अन्तिम खेलमा प्रदेश ३ ले सुदुरपश्चिम प्रदेशलाई ६ विकेटले पराजित अन्तिम चारको स्थान तय गरेको हो । १ सय ५५ रनको विजयी लक्ष्य लिएर मैदानमा ब्याटिङ गरेको प्रदेश ३ ले ३३ दशमलब २ ओभरमा मात्र ४ विकेटको क्षतीमा निर्धारित लक्ष्य पुरा ग-यो ।

प्रदेश ३ का लागि इशान पाण्डेले ५३ रन, आदील खानले ३३ रन तथा कप्तान पारस खड्काले २६ रन बनाए । यता सुदुरपश्चिमका विकास अग्री, शेर मल्ल, विनोद लामा र महेश अधिकारीले समान १-१ विकेट हात पारे । 

यसअघि टस जितेर पहिले ब्याटिङ गरेको सुदुरपश्चिमले ४५ दशमलब १ ओभरमा सबै विकेट गुमाउँदै १ सय ५४ रनको योगफल तयार पारेको थियो । सुदुरपश्चिमका लागि खडक बोहराले ४० रन, रोशन अधिकारीले २७ रन, नरेश बोहराले २६ तथा कप्तान शेर मल्लले १४ रन जोडेका थिए । 

प्रदेश ३ का सुर्य तामाङले ३ विकेट लिए । यो जितसँगै समूह ‘ए’ को प्रदेश ३ ले ४ खेलबाट ६ अंक जोड्यो । र, प्रदेश ३ समूह विजेता बन्दै सेमिफाइनलमा पुगेको हो । त्यस्तै ६ अंक नै जोडेको एपीएफ भने उपविजेता बन्दै अघिल्लो चरणमा पुगेको हो ।