मकवानपुरबाट लागुऔषध गाँजा बरामद

काठमाडौं । मकवानपुरबाट अवैध लागुऔषध गाँजा प्रहरीले बरामद गरेको छ ।

थाहा नगरपालिका–७ देउखेलस्थित सडकबाट अवैध लागुऔषध गाँजा करिब १ सय किलो ४ सय २० ग्राम शुक्रवार बिहान प्रहरीले बरामद गरेको हो ।

इलाका प्रहरी कार्यालय पालुङबाट गस्तीमा खटिएको प्रहरीलाई देख्नासाथ ना.२० प १८६७ र प्रदेश ३–०२–०१२ प १५९२ नम्बरको मोटरसाइकमा सवार अपरिचित व्यक्तिहरूले मोटरसाइकल छाडी फरार भएपश्चात मोटरसाइकलमा रहेको २ वटा पोकामा रहेको उक्त परिमाणको गाँजा फेला पारी बरामद गरेको हो ।

प्रहरीले हाल फरार व्यक्तिहरूको खोजी गर्नुका साथै यस सम्बन्धमा आवश्यक अनुसन्धान गरिरहेको छ ।