हतियारसहित तीनजना पक्राउ

काठमाडौं । विभिन्न स्थानबाट हातहतियारसहित तीनजना पक्राउ परेका छन् ।

उदयपुरको त्रियुगा नगरपालिका–१२ बाट चाईनिज पेस्तोल जस्तो देखिने वस्तु १ थानसहित सोही नगरपालिका–३ भुल्के बस्ने २० वर्षीय जुलेस रायमाझीलाई आइतबार दिउँसो प्रहरीले पक्राउ गरेको हो । जिल्ला प्रहरी कार्यालय उदयपुरबाट खटिएको प्रहरी टोलीले उनलाई उक्त पेस्तोलसहित पक्राउ गरेको हो ।

यसैगरी ताप्लेजुङको पाथीभरा याङबरक गाउँपालिका–४ डुम्रिसे बस्ने ४३ वर्षीय नरेश फुयाङ लिम्बुलाई भरूवा बन्दुक १ थान, सोही बन्दुकमा प्रयोग हुने बारूद, सिसाको टुक्रा र दाउ १ थानसहित आइतबार साँझ प्रहरीले पक्राउ गरेको हो । इलाका प्रहरी कार्यालय तेल्लोकबाट खटिएको प्रहरी टोलीले उनलाई उक्त हातहतियारसहित पक्राउ गरेको हो ।

त्यसैगरी सर्लाहीको लालबन्दी नगरपालिका–१५ बोरे डाडा बस्ने ५० वर्षीय रामलाल मोक्तानलाई मेड इन युएसए लेखिएको रिभल्वर १ थानसहित गएराति प्रहरीले पक्राउ गरेको हो । मधेश प्रदेश प्रहरी कार्यालय जनकपुर धनुषा र इलाका प्रहरी कार्यालय लालबन्दीबाट खटिएको प्रहरी टोलीले मोक्तानको घर तलासी गर्दा उक्त रिभल्वर फेला पारी उनलाई पक्राउ गरेको हो ।

यस सम्बन्धमा प्रहरीले आवश्यक अनुसन्धान गरिरहेको छ ।

ंं