अत्याधिक मदिरा सेवन गरेर जहाजभित्रै हल्ला गरेपछि गायक राजेशपायल राईलाई फर्काइयो

काठमाडौं । दुबईमा सांगीतिक कार्यक्रममा जान लागेका गायक राजेशपायल राईलाई अत्याधिक मदिरा सेवन गरेर होहल्ला गरेको भन्दै एयरलाइन्सले त्रिभुवन अन्तर्राष्ट्रिय विमानस्थलबाटै फर्काइदिएको छ । उनी फ्लाई दुबईबाट दुबई जान लागेका थिए ।

बोडिङ पास लिएर जहाजमा पुगेका उनले जहाजभित्रै होहल्ला गरेका थिए । त्यहाँ उनलाई एयरलाइन्स कर्मचारीले नियम पालना गर्न पनि भनेका थिए । तर नमानेपछि उनलाई एयरलाइन्सले प्रहरीको जिम्मा लगाएको प्रहरी स्रोतले बतायो ।

जहाजमा मदिरा सेवन गर्न पाइने भए पनि अन्य यात्रुसँग होहल्ला गर्न नपाइने नियम रहेको छ । उनलाई छोडेर जहाज दुबई उडिसकेको पनि स्रोतले बतायो । मदिराको नसा कम भएपछि राई अर्को जहाजमा पुनः बोडिङ गरेर जान सक्ने प्रहरीले जनाएको छ ।