ओमानमा तेल ट्याङ्कर जहाज समुन्द्रमा पल्टिँदा १६ जना बेपत्ता

काठमाडौं । ओमान नजिकैको समुन्द्रमा एक तेल ट्याङ्कर जहाज पल्टिँदा चालक दलका सदस्यसहित १६ जना बेपत्ता भएका छन् ।

जहाजमा अफ्रिकी देश कोमोरोसको झण्डा रहेको मिडिया रिपोर्टमा उल्लेख गरिएको छ ।

ओमानको सामुद्रिक सुरक्षा केन्द्रले सामाजिक सञ्जाल ‘एक्स’ मा जहाज पल्टिएको जानकारी दिएको छ ।

सामुद्रिक सुरक्षा केन्द्रका अनुसार जहाज डुबेको जानकारी प्राप्त हुनासाथ खोजी तथा उद्धार कार्य सुरु गरिएको थियो ।

जहाजमा रहेका १६ सदस्यीय चालक दलमध्ये १३ भारतीय नागरिक र तीन जना श्रीलंकाका नागरिक रहेको बताइएको छ ।