सवारी दुर्घटनाबाट सुदूरपश्चिममा एक वर्षमा एक सय ७२ जनाको मृत्यु

अत्तरिया । गत आर्थिक वर्ष २०८०/८१ मा सुदूरपश्चिम प्रदेशमा सवारी दुर्घटनाबाट एक वर्षमा एक सय ७२ जनाको मृत्यु भएको छ । सवारी दुर्घटनाबाट एक सय ३७ पुरुष, २३ महिला, सात बालक र पाँच बालिकाको मृत्यु भएको प्रहरीले जनाएको छ ।

प्रहरीका अनुसार सवारी दुर्घटनामा परी गम्भीर र सामान्य गरी पाँच सय ३६ जना घाइते भएका छन् । जम्मा ३ सय ९वटा सवारी दुर्घटना भएका थिए । दुर्घटना भएका सवारी साधनमध्ये सबैभन्दा बढी मोटरसाइकल रहेको छ ।

गत आर्थिक वर्ष २०८०/८१ मा दुई सय सात मोटरसाइकल, ५० जिप र कार, ४० ट्र्याक्टर, २४ बस, १७ टेम्पो, १९ ट्रक र ट्याङ्कर, नौ टिप्पर, सात माइक्रो, तीनवटा डोजर र ३० अन्य सवारी साधन गरी चार सय ६ वटा सवारी साधन दुर्घटना भएको थियाे ।