बंगलादेशमा हिंसा पुनः भड्कियो, आज मात्रै आठ जनाको मृत्यु

ढाका । प्रधानमन्त्री शेख हसिनाको राजीनामाको माग गर्दै प्रदर्शनमा उत्रिएका हजारौं प्रदर्शनकारी र सरकारबीच आज आइतबार झडप हुँदा आठ जनाको मृत्यु भएको छ । सयौं घाइते भएका छन् ।

हजारौं बंगलादेशी प्रदर्शनकारीहरू प्रधानमन्त्री हसिनाको राजीनामा माग गर्दै सामूहिक विरोध प्रदर्शनका लागि आज मध्य ढाकामा भेला भएका छन् ।

सरकारी सेवामा आरक्षण प्रणालीविरुद्धको -यालीका क्रममा जुलाईदेखि शनिबारसम्म भएका हुलदंगामा २०० भन्दा बढी व्यक्तिको ज्यान गएको थियो । राष्ट्रव्यापी नागरिक अवज्ञा अभियानका प्रमुख प्रदर्शनकारीमध्ये एक आसिफ महमुदले समर्थकहरूलाई सरकारविरुद्ध लड्न तयार हुन आग्रह गरेका छन् ।

‘बंगलादेशलाई स्वतन्त्र बनाउने तयारी गर्नुहोस्,’ उनले आइतबार सामाजिक सञ्जाल फेसबुकमा लेखेका छन् ।
सेनाले आरक्षण प्रणालीको चर्को विरोधका बीच सरकार पुनस्र्थापना गर्न मद्दत गरिरहेको बेला केही पूर्व सैन्य अधिकारीहरू भने विद्यार्थी आन्दोलनमा सामेल भएका छन् ।

पूर्व सेना प्रमुख जनरल इकबाल करिम भुइयाँले प्रदर्शनसँग समर्थित रहेको प्रतिबिम्बित गर्दै आफ्नो फेसबुक प्रोफाइल तस्बिर रातो बनाएका छन् । वर्तमान सेना प्रमुख वाकर–उज–जमानले शनिबार ढाकाको सैन्य मुख्यालयमा अधिकारीसँग कुरा गर्दै भने, ‘बंगलादेशी सेना जनताको विश्वासको प्रतीक हो ।’

‘हामी सँधै जनताको पक्षमा उभिएका छौ र जनताको हित र राज्यको कुनै पनि आवश्यकताको समयमा जनताको साथमा हुनेछौँ,“ शनिबार जारी भएको सेनाको विज्ञप्तिमा उनले भनेका छन् । विज्ञप्तिमा सेनाले विरोध प्रदर्शनलाई समर्थन गरेको छ वा छैन भनेर स्पष्ट रूपमा भनिएको छैन ।

सेनाले केही समयका लागि आन्दोलनको अवस्था शान्त बनाएर व्यवस्था पुनःस्थापित गरेको भएतापनि प्रधानमन्त्रीको राजीनामाको माग गर्दै यस हप्ता ठूलो संख्यामा जनता पुनः सडकमा फर्किएका छन् ।