बागलुङको बडिगाडमा पहिरोमा मृत्यु हुनेको संख्या ८ पुग्यो

पोखरा । बागलुङको बडिगाड गाउँपालिकामा पहिरोमा परी मृत्यु हुनेको संख्या ८ पुगेको छ । वडा नम्बर १० दर्लिममा ६ जना र वडा नम्बर ९ को बलघाँसमा २ जना गरी आठ जनाको मृत्यु भएको छ ।

प्रमुख जिल्ला अधिकारी नेत्रप्रसाद सुवेदीका अनुसार, बडीगाड गाउँपालिका–१० मा घरगोठ बगाउँदा मृत्यु हुनेमा ७ वर्षीया मालती बुढा, ७ वर्षीया मधु बुढा, सञ्जु विककी ६ महिने नाबालिका छोरी, १३ वर्षीय मनोज बुढा, अन्दाजी १२/१३ वर्षका अमन बुढा र ५९ वर्षीय मैतीदेवी विक रहेका छन् ।

सो ठाउँकी संगीता बुढा, सुमित्रा विक, सीता थापा र मंगलसिंह बुढा घाइते भएका छन् । यसैगरी वडा नम्बर ९ मा १५ वर्षीय विधान परियार र गंगा विकको मृत्यु भएको छ ।