सोलुखुम्बुमा हिम पोखरी फुटेको आशंका, सुरक्षाकर्मी ‘हाई अलर्ट’ मा

काठमाडौं । सोलुखुम्बुमा हिमपोखरी फुटेको आशंका गरिएको छ ।

जिल्लाको खुम्बु पासाङल्हामु गाउँपालिकामा हिमपोखरी फुटेको वा हिमपहिरो आएको आशंका गरिएको प्रमुख जिल्ला अधिकारी देवी पाण्डे खत्रीले लोकपथलाई जानकारी दिइन् ।

उनका अनुसार अहिलेसम्म कुनै मानवीय क्षति भने भएको छैन । तर त्यस क्षेत्रका ४–५ वटा घरहरु बगाएका छन् । साथै एक होस्टेलसहितको विद्यालय बगाएको छ ।

‘हिमपोखरी फुटेको वा हिमपहिरो नै हो भन्ने पत्ता लागिसकेको छैन । मानवीय क्षति भएको जानकारी नआए पनि ४–५ वटा घर र एक विद्यालय बगाएको छ,’ उनले लोकपथसँग भनिन् ।

नदीमा पानीको बहाव बढ्न थालेपछि प्रभावित हुनसक्ने स्थानीयहरुलाई सुरक्षित स्थानमा सारिएको छ । साथै अहिले सुरक्षाकर्मीको परिचालन गरेर हुनसक्ने जोखिम कम गर्ने काम भइरहेको उनले बताइन् ।

‘नदीमा पानीको बहाव र लेदो बढिरहेको छ । जसकारण हुनसक्ने क्षतिलाई कम गर्न सुरक्षाकर्मीलाई हाई अलर्टमा राखिएको छ,’ उनले भनिन् ।