प्रधानमन्त्रीलाई भेट्न नपाएको वामदेवको गुनासो

काठमाडौं । राष्ट्रियसभा सदस्य वामदेव गौतमले आफूले प्रधानमन्त्री केपी ओलीसँग भेटेर समस्या राख्न खोज्दा समय नपाएको गुनासो गरेका छन् ।

आइतबार बसेको राष्ट्रियसभाको विशेष समयमा बोल्दै उनले देशमा घटिरहेको घटनाका बारेमा प्रधानमन्त्रीसँग भेट्न खोजेपनि समय नपाएको कारण राष्ट्रियसभालाई गुहार्न बाध्य भएको बताए ।

उनले भने, ‘देशको प्रमुख व्यक्तिसँग भेटेर कुरा गर्दा पनि हुने विषय हो हुन त । तर मैले समय पाउँदिन सरकारका माथिल्लो तहका प्रधानमन्त्रीसँग भेट गर्न त्यसैले मैले आज राष्ट्रिय सभालाई गुहारेको छु ।’ 

उनले भौगोलिक अवस्थाले नेपालमा विश्वकै सबैभन्दा बढि प्राकृतिक घटनाहरु घट्ने गरेको बताए । प्राकृतिक घटनाहरुको पूर्वतयारीमा नेपालका राजनीतिक दलका नेताहरू र प्रधानमन्त्रीको समेत ध्यान जान नसकेको उनको भनाई छ । 

उनले भने, ‘नेपालमा जतिपनि घटना घटेका छन् हाम्रो प्राकृतिक अवस्था, भौगोलिक अवस्थाले हो । यो देशमा यति धेरै घटना घट्छन् संसारमा अरु कुनै पनि देशमा घट्दैन । प्राकृतिक घटनाहरु घट्नुभन्दा पहिले नै गर्नुपर्ने कामहरुका निम्ति नेपालका राजनीतिक पार्टी, प्रधानमन्त्री कसैको पनि ध्यान गएन ।’