प्रदीप गिरीलाई यसरी सम्झिन्छन् गृहमन्त्री लेखक

काठमाडौं । गृहमन्त्री रमेश लेखकले नेपाली कांग्रेसका दिवंगत नेता प्रदीप गिरीलाई ज्ञानको समुन्द्र रहेको बताएका छन् ।

प्रदीप गिरी आश्रम लहानमा आयोजित दिवंगत नेता गिरिको दोस्रो स्मृति सभालाई सम्बोधन गर्दै मन्त्री लेखकले उक्त कुरा बताएका हुन् । 

गृहमन्त्री लेखकले प्रदीप गिरी सधै भूईँमान्छेका कुरा उठाउने भन्दै नेपाली कांग्रेसको दस्ताबेजहरूमा ‘दमजम’अर्थात दलित, महिला, जनजाति र मधेसी उनकै विचार अनुसार समावेश गराइएको बताए । 

उनले भने, ‘पछि कर्णालीको विकास भन्ने पनि उहाँकै दूरदर्शीता थपिएको हो । संविधान निर्माणमा महत्वपूर्ण भूमिका खेल्नु भएको गिरिले मधेस र मधेसीलाई समेट्न नसकेको भन्दै फरक मत राख्नुभयो र हस्ताक्षर गर्नुभएन । उहाँको हृदयले स्वीकार नगर्दा कसैको पनि डर मानेर नगल्ने प्रवृतिका हुनुहुन्थ्यो, मार्क्सवादी कम्युनिष्ट सिद्धान्तको पनि उहाँ अध्येता र विश्लेषक हुनुहुन्थ्यो ।’

कार्यक्रममा बोल्दै स्वर्गीय गिरीकी पत्नी भारती शिलवाल गिरी ‘पिजी’ अर्थात प्रदीप गिरी बहुआयमिक प्रतिभा भएको स्मरण गरिन् । उनले भनिन्, ‘पिजी साहित्यकार, राजनीतिज्ञ, अर्थशास्त्री, राजनीतिशास्त्री, लेखक विश्लेषक सबै थिए ।’

शिलवाल गिरिले ‘पिजी’को सम्झनामा आश्रममै प्रदीप गिरी फाउन्डेसन स्थापना गरिएको र यहाँबाट कमजोर वर्गहरूको उत्थानका लागि काम गर्ने घोषणा पनि गरिन् ।  स्मृति सभामा नेपाली कांग्रेसका जिल्ला स्तरीय नेता तथा कार्यकर्ताहरूले प्रदीप गिरिको व्यक्तित्व र कृत्तित्वमाथि प्रकाश पारेका थिए ।