सवारी दुर्घटनामा दुई जनाको मृत्यु

काठमाडौं । काभ्रे र बारामा सवारी दुर्घटना हुँदा २ जनाको मृत्यु भएको छ ।

काभ्रेको भुम्लु गाउँपालिका–१० छपन्न किलोस्थित सडकमा काठमाडौंबाट बाह्रबिसेतर्फ जाँदै गरेको बा.२ ख ९०६४ नम्बरको बसको ठक्करबाट एक महिलाको मृत्यु भएको छ । मृत्यु हुनेमा हाल नाम, थर, वतन नखुलेकी अन्दाजी ४५ वर्षीया महिला रहेकी छन् ।ठक्करबाट गम्भीर घाइते भएकी उनको धुलिखेल अस्पतालमा उपचारको क्रममा बिहीबार बेलुकी मृत्यु भएको हो । बस चालकलाई प्रहरीले नियन्त्रणमा लिएको छ ।

यसैगरी बाराको कलैया उपमहानगरपालिका–१६ विद्यानगरस्थित सडकमा कलैयाबाट पिलुवातर्फ जाँदै गरेको लु.९५ प ६३५४ नम्बरको मोटरसाइकल अनियन्त्रित भई दुर्घटना हुँदा चालकको मृत्यु भएको छ । हाल नाम, थर, वतन नखुलेका अन्दाजी २४ वर्षीय पुरूषको शुक्रबार बिहान घटनास्थलमै मृत्यु भएको हो ।

दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।