च्यासल पुलबाट बागमतीमा हामफालेकी युवती अझै बेपत्ता, खोजीमा सशस्त्रको गोताखोर टोली पनि परिचालन

काठमाडौं । ललितपुर महानगरपालिका–९ च्यासलस्थित पुलमाथिबाट आइतबार साँझ बागमतीमा हामफालेकी एक युवती अझै बेपत्ता छिन् । ललितपुर प्रहरीका प्रवक्ता एसपी नरेशराज सुवेदीले हामफालेकी युवतीको खोजी भइरहे पनि अवस्था पत्ता लाग्न नसकेको बताए ।

ती युवतीको खोजीका लागि नेपाल प्रहरी र सशस्त्र प्रहरीको टोली बिहानदेखि नै परिचालन गरिएको छ । सशस्त्र प्रहरीका सहप्रवक्ता तथा सूचना शाखा प्रमुख डीएसपी शैलेन्द्र थापाका अनुसार, सशस्त्र प्रहरीको नं. २१ गणबाट इन्सपेक्टरको कमाण्डमा १३ जना र नं. २ विपद् उद्धार गणबाट असईको कमाण्डमा ४ जना गोताखोरसहित ९ जनाको टोली परिचालन गरिएको छ । ती युवती हामफालेका पुलमुनि अन्जली शर्मा, घर रुकुम मुसिकोट लेखिएको नोटसहतिको झोला र मोबाइल भेटिएको थियो । भेटिएका कागजपत्र तथा मोबाइल हामफाल्ने युवतीकै हो वा अन्य युवतीको हो भन्नेबारे प्रहरीले अनुसन्धान गरिरहेको छ ।