स्रोत नखुलेको रकमसहित तीन जना पक्राउ

काठमाडौं । वीरगन्ज र रौतहटबाट स्रोत नखुलेको रकमसहित तीन जना पक्राउ परेका छन्  । वीरगन्ज महानगरपालिका–१६ स्थित भानु प्लाजा होटलबाट स्रोत नखुलेको ४ लाख २९ हजार भारतीय रूपैयाँ र ३ लाख ९० हजार नेपाली रूपैयाँसहित २ जना पक्राउ परेका हुन् । 

पक्राउ पर्नेहरूमा भारत राजस्थान ढुगंरपुर पाली बस्ने ३६ वर्षीय बाबुलाल र २८ वर्षीय श्रवण बिसनोई रहेका छन् । जिल्ला प्रहरी कार्यालय पर्साबाट खटिएको प्रहरी टोलीले होटेल तलासी गर्दा उनीहरूलाई उक्त रकमसहित फेला पारी  बुधबार दिउँसो पक्राउ गरेको हो । साथै उनीहरूले प्रयोग गरेको डिएल ३ सिबि यु ८०३५ नम्बरको कारसमेत प्रहरीले बरामद गरेको छ । 

त्यसैगरी रौतहटको गौर नगरपालिका–१ मेन चोकबाट भारत घर भएका १८ वर्षीय किशोरलाई स्रोत नखुलेको नगद ४ लाख रुपैयाँसहित बुधबार दिउँसो प्रहरीले पक्राउ गरेको छ । जिल्ला प्रहरी कार्यालय रौतहटबाट खटिएको प्रहरीले उनलाई उक्त रकम सहित पक्राउ गरेको हो । उनलाई आवश्यक अनुसन्धान एवं कारबाहीको लागि गौर भन्सार कार्यालय रौतहट पठाइएको छ । 

यस सम्बन्धमा प्रहरीले थप अनुसन्धान गरिरहेको छ ।