काठमाडौं । वन तथा वातावरण मन्त्री ऐन बहादुर शाही ठकुरीले जलवायु परिवर्तनमा नेपालको कुनै दोष र भूमिका नभए पनि यसको असर भोगिरहेको बताएका छन् ।
आइतबार सिंहदरबारमा बसेको विकास, आर्थिक मामिला तथा सुशासन समितिको बैठकमा विश्व जलवायु सम्मेलन (कोप २९) मा नेपालको सहभागिताका लागि आवश्यक तयारी विषयक छलफलमा सहभागी हुँदै मन्त्री शाहीले कोप–२९मा नेपालको सहभागितालाई अझै प्रभावकारी र उपलब्धिमूलक बनाउन सरकारले आवश्यक छलफल गरिरहेको बताएका हुन् ।
उनले भने, ‘हामी जलवायु परिवर्तनको असरबाट निकै प्रभावित भएका छौँ । जलवायु परिवर्तन हुने क्रियाकलापमा केही दोष र तापक्रम बढाउने काममा नेपालको भूमिका छैन । तर, पनि यसको असर भोग्नुपरेको छ । विगतका सम्मेलनहरू (कोप–२७ र २८) मा हाम्रो देशबाट नेतृत्व गर्नुहुने प्रधानमन्त्रीज्यू लगायतको टिमले धेरै विषयमा विश्वलाई सचेत गराएको छ । कोप–२९लाई अझै प्रभावकारी र उपलब्धिमूलक बनाउनका लागि हामीले योसँग सम्बन्धित विशेषज्ञ र निकायहरू र सम्बद्ध अन्तर्राष्ट्रिय साझेदारहरूसँग व्यापक छलफल र तयारी गरिरहेको छ ।’
गत वर्ष संयुक्त अरब इमिरेट्समा सम्पन्न कोप–२८को मा भएका कमी कमजोरीहरूलाई नदोहोर्याउने गरी आवश्यक तयारी भइरहेको उनको भनाइ छ ।
कोप–२९मा सहभागी हुन पूर्व नेपालमा राष्ट्रिय सम्मेलन गर्ने र प्राविधिक पक्ष, राजनीतिक नेतृत्व, संघीय संसद्का दुवै सदन अन्य निकायहरूसँग समेत छलफल गरेर सहभागिता जनाउने उनले उल्लेख गरे ।
उनले भने, ‘समितिबाट आएका सुझावहरूलाई लिएर विगतका गल्तीहरू नदोहोरिने गरी तयारी गर्ने विश्वास समेत दिलाउन चाहन्छु । त्योसँग सम्बन्धित प्राविधिक पक्ष, राजनीतिक नेतृत्व, संघीय संसद्का दुवै सदन अन्य निकायहरूसँग समेत छलफल गरेर अगाडि बढ्न पहल गर्नेछ । वन तथा वातावरण जलवायुसम्बन्धी फोकल मन्त्रालय भएको हिसाबले अबको कोपलाई नेपालका एजेण्डाहरु र नेपालको पक्षयमा कसरी ल्याउन सकिन्छ भनेर थप आवश्यक छलफल गर्नेछौँ ।’
यो खबर पढेर तपाईलाई कस्तो महसुस भयो ?
प्रतिक्रिया