विपद्को कहर : ललितपुरका धेरै स्थानमा अझै विद्युत आपूर्ति भएन 

काठमाडौं । अविरल वर्षाका कारण ललितपुरमा भएको विद्युत आपूर्तिलाई नियमित बनाउन नेपाल विद्युत प्राधिकरणले अधिकतम प्रयास गरिरहेको जनाएको छ । 

यही असोज ११ र १२ गतेको अविरल वर्षाका कारण ललितपुरको अधिकांश स्थानमा बिजुली आपूर्ति अवरुद्ध भएको थियो । कैयौँ स्थानमा पोल ढलेको, वितरण लाइनमा क्षति पुगेका कारण विधुत आपूर्तिमा कठिनाइ हुँदै आएको थियो ।

काठमाडौं र भक्तपुरमा आइतबारदेखि नै नियमित रूपमा बिजुली उपलब्ध भइसकेको भए पनि ललितपुरका सहरी क्षेत्र बाहेकका स्थानमा अझै मर्मत सम्भार जारी रहेको प्राधिकरणले जनाएको छ । प्राधिकरणको लगनखेल वितरण केन्द्रका प्रमुख विजय महतोका अनुसार कतिपय स्थानमा सडक यातायात सञ्चालन हुन नसक्दा मर्मत सम्भारमा समस्या भएको छ ।

प्राधिकरणका प्रवक्ता चन्दनकुमार घोषका अनुसार मर्मत सम्भारका लागि आवश्यक जनशक्ति परिचालन गरिएको र आज साँझसम्म धेरै स्थानमा नियमित बिजुली उपलब्ध हुनेछ ।

लाकुरी भञ्जाङमा १० वटा पोलमा क्षति भएको छ भने सडकमा पहिरो आउँदा मर्मत सम्भारमा जनशक्ति परिचालन गर्न समस्या परेको छ ।

भट्टेडाँडामा रहेको नागरिक उड्डयन प्राधिकरणको राडार नजिक भएको क्षतिको यकिन विवरण रूपमा प्राप्त हुन सकेको  छैन । तर सो स्थानमा आज अबेरसम्म बिजुली उपलब्ध गराउने गरी तयारी गरिएको प्राधिकरणले जनाएको छ ।

यस्तै, देशका अन्य स्थानमा भएको क्षतिको विवरणका आधारमा मर्मत सम्भारको कामलाई तीव्र पारिएको जानकारी दिँदै प्राधिकरणले बत्ती नभएको स्थानबारेमा जानकारी गराउन समेत आग्रह गरेको छ । 

यस्तै, प्राधिकरणले बाढीका कारण क्षति भएका ठुला प्रसारण लाइनको समेत मर्मत सम्भारको प्रक्रिया अगाडि बढाएको छ । काबेली करिडोर, खिम्ती लामोसाँघु एक सय ३२ केभी प्रसारण लाइनमा समेत क्षति पुगेको छ । ती प्रसारण लाइनको टावर ढल्दा बिजुली प्रवाहमा समस्या उत्पन्न भएको छ ।