काठमाडौं । उद्योग वाणिज्य तथा आपूर्तिमन्त्री दामोदर भण्डारीले नेपालमा उत्पादित सुपारी निर्यात सम्बन्धी विषयले सर्वोच्च अदालसम्म प्रवेश पाएको बताएका छन् ।
मंगलबार बसेको विकास, आर्थिक मामिला तथा सुशासन समितिको बैठकलाई सम्बोधन गर्दै मन्त्री भण्डारीले सुपारी निर्यात विषय धेरै पटक छलफलको विषय बने पनि अहिले अदालसम्म प्रवेश पाएर केही आदेशहरू जारी भइसकेको बताएका हुन् ।
उनले भने, ‘नेपालमा उत्पादित सुपारी निर्यात सम्बन्धी विषयमा धेरै पटक छलफलको विषय बन्यो । संसद्मा, मन्त्रालयमा मात्र होइन यो विषयले अहिले सर्वोच्च अदालसम्म प्रवेश पाएको छ । त्यहाँबाट पनि केही आदेशहरू जारी भइसकेका छन् ।
उत्पादनका थुप्रै तथ्यहरू छन् । अहिले पनि राज्य प्रणालीभित्रका तथ्यांकहरु सही नभएको अवस्थामा छन् । पछिल्लो समय कृषि मन्त्रालयसँग सम्बन्धित तथ्यांकहरु आउनुपर्ने हो तर त्यो तथ्यांकहरु आउन नसकेको अवस्था छ ।’
साथै उनले नेपालमै उत्पादन भएको सुपारीलाई बजार दिलाउनको लागि सरकार लागि परेको बताए । उनले समितिबाट निर्देशित भए मात्र सुपारी परीक्षण कृषि मन्त्रालयले गर्न सक्ने बताए । उनले बाहिरको भन्दा नेपाली उत्पादन महँगो भएकाले पनि सुपारीको व्यापारले बजार नपाएको बताए ।
उनले भने, ‘अन्यन्त्र भन्दा नेपाली उत्पादन महँगो भयो । अहिले खास गरी गुट्खा बनाउने उद्योगहरू विशेष गरी सुपारी प्रयोग गरिरहनु भएको छ । गत वर्ष गुट्खाबाट ९ अर्ब राजस्व संकलन भएको छ । रोजगारी पनि सिर्जना भएको छ । तर अझ बढी भारतमा निर्यात गर्न सकिन्छ । तर बाह्य वस्तु आयात गर्दा खेरी सस्तो पर्ने र नेपालको उत्पादन गरेको सुपारी महँगो पर्ने भएर बाहिरबाट आयात गर्नुपर्ने अवस्था छ ।’
यो खबर पढेर तपाईलाई कस्तो महसुस भयो ?
प्रतिक्रिया