मकवानपुर । पूर्व–पश्चिम सडक खण्डअन्तर्गत पर्ने हेटौँडा उपमहानगरपालिका वडा नम्बर-१५ रातोमाटेबाट प्रहरीले आज बिहान लुकाई छिपाइ ल्याइएको सुनसहित दुई भारतीय नागरिकलाई पक्राउ गरेको छ ।
पक्राउ पर्नेहरूमा भारतको महाराष्ट्र राज्य सांगली जिल्ला दिघंची थाना पुजारवाडी बस्ने २५ वर्षीय अभिषेक अजिनाथ कुटी र महाराष्ट्र राज्य सांगली जिल्ला बस्ने २७ वर्षीय राहुल भिट्टिहाल रहेको जिल्ला प्रहरी कार्यालयले जनाएको छ ।
प्रहरीका अनुसार आज बिहान ३ बजेको समयमा पथलैयाबाट हेटौँडातर्फ आउँदै गरेको बागमती प्रदेश ०२–०४७ प ७५०३ नम्बरको स्कुटरलाई रोकी जाँच गर्ने क्रममा स्कुटर चालक अभिषेक र स्कुटरमा सवार राहुलको साथबाट आठ वटा बिस्कुटको आकारको आठ किलो २४३ ग्राम ९७० मिलिग्राम सुन बरामद भएपछि निजहरूलाई पक्राउ गरिएको हो ।
उनीहरूको साथबाट बरामद भएको उक्त परिणामको सुनको मूल्य आजको मूल्यअनुसार ११ करोड ४३ लाख ५७ हजार ८७८ रहेको प्रहरीले पत्रकार सम्मेलन मार्फत जानकारी गराएकाे छ । पक्राउ परेका दुवै जनालाई थप अनुसन्धान तथा कारबाहीका लागि राजस्व अनुसन्धान कार्यालय पथलैया बारा पठाउने तयारी भइरहेको जनाइएको छ ।
यो खबर पढेर तपाईलाई कस्तो महसुस भयो ?
प्रतिक्रिया