सवारी दुर्घटनामा सशस्त्र र नेपाल प्रहरीका दुई जवानको मृत्यु

विराटनगर । मोरङमा भएका छुट्टाछुट्टै दुई सवारी दुर्घटनामा दुई प्रहरी जवानको मृत्यु भएको छ । दुर्घटनामा परी नेपाल प्रहरी र सशस्त्र प्रहरीका एक–एक जवानको मृत्यु भएको हो । एक जना घाइते भएका छन् ।

पूर्व–पश्चिम राजमार्गअन्तर्गत बेलबारी नगरपालिका–८ चिसाङ पुल नजिक आइतबार साँझ पौने ७ बजे कार र मोटरसाइकल आपसमा ठोक्किएर दुर्घटना हुँदा प्रहरी जवान ३२ वर्षीय चित्रसागर राईको मृत्यु भएको प्रहरीले जनाएको छ । उनी अस्थायी प्रहरी चौकी नडाहा सुनसरीमा कार्यरत थिए ।

पश्चिमबाट पूर्वतर्फ जाँदै गरेको प्रदेश ३–०१–०२४ च ०७३४ नम्बरको कार र पूर्वबाट पश्चिमतर्फ आउँदै गरेको प्रदेश १–०२–०४४ प ४९९६ नम्बरको मोटरसाइकल दुर्घटना भएको थियो ।

यस्तै, कोशी राजमार्गको बूढीगंगामा मिक्सचर ट्रकको ठक्करबाट मोटरसाइकलमा सवार सशस्त्र प्रहरीका जवान चन्द्रबहादुर तामाङको मृत्यु भएको छ ।

२७ वर्षीय तामाङ मोटरसाइकलको पछाडि सवार थिए । उनी सशस्त्र प्रहरी बल नेपाल नम्बर ३ गण कंकालीनी टंकीसिनवारीमा कार्यरत थिए । दुर्घटनामा मोटरसाइकल चालक सशस्त्र प्रहरी बल नेपाल नम्बर ३ गण कंकालिनी टंकीसिनवारीमा कार्यरत अर्का जवान ३० वर्षीय युशन राई घाइते भएका छन् ।