सकेटबम विस्फोट हुँदा एक जना घाइते  

काठमाडौं । स्याङ्जा चापाकोट नगरपालिका–४ मा सकेटबम विस्फोट हुँदा एक जना घाइते भएका छन् ।

सोही ठाउँ बस्ने ४५ वर्षीय गोविन्द पुरीको तीन तले घरको दोस्रो तलामा पुराना भाडावर्तन फाल्ने क्रममा अचानक सकेटबम विस्फोटन हुँदा घाइते भएका हुन् । 

उक्त दुर्घटनाबाट पुरीको बायाँ आँखा भन्दा मुनी, बायाँ खुट्टा र नाइटो भन्दा तल चोट लागेको प्रहरीले जनाएको छ । 

जिल्ला प्रहरी कार्यालय स्याङजाबाट खटिएकाे प्रहरी अधिकृत सहितको SOCO टोली र सिंह सार्दुल गुल्म स्याङ्जाबाट बम डिस्पोजल टोली घटनास्थलमा खटाई उक्त बम डिस्पोज गरिएकाे जिल्ला प्रहरी कार्यालय स्याङ्जाका नायव उपरीक्षक हरि प्रसाद पौडेलले बताए ।

साथै घटनास्थलबाट उक्त टोलीले पीइके ९ सय ग्राम, डेकटक २ थान, जंगी राउण्ड १ थान र खाली खोका २ थान बरामद गरेको थियाे ।

उपचार पश्चात पुरीलाई इलाका प्रहरी कार्यालय चापकोट स्याङ्जाले नियन्त्रणमा लिएको छ।