काठमाडौं । कृषि तथा पशुपन्छी विकासमन्त्री रामनाथ अधिकारीले मुलुकमा गरिबी न्यूनीकरणका लागि कृषिमा आत्मनिर्भर बन्नुपर्नेमा जोड दिएका छन् । आफू किसानको छोरो भएकाले कृषि क्षेत्रको विकासमा निस्वार्थ भावनाले सेवा गर्ने पनि बताए ।
नेपाल चेम्बर अफ कमर्सले आज आयोजना गरेको कृषिमा लगानी दशक सान्दर्भिकता र निजी क्षेत्रको भूमिका विषयक अन्तरक्रिया कार्यक्रममामा मन्त्री अधिकारीले गरिबी हटाउन पहिलो कृषिमा आत्मनिर्भर हुनुपर्नेमा जोड दिए ।
कृषिकर्मीमा लागेकाहरूको स्थानीय स्तरको सुझाव संकलन गरेर त्यसको कार्यान्वयनका लागि आफूले सकारात्मक प्रयास गरिरहेको पनि बताए । उनले नेपालमा उत्पादन हुने रैथानी बाली प्रोत्साहन गर्न सामूहिक र व्यवसायीक खेतीमा जोड दिनुपर्ने बताए ।
सरकारले कतिपय कृषि उपजहरूको आयातमा रोक लगाइएको भन्दै मन्त्री अधिकारीले कृषिमा अनुदान दुरुपयोग गर्नेलाई कारबाहीको दायरामा ल्याउन जरुरी रहेको बताए ।
कृषिको विकासको लागि थप लगानी वृद्धि गर्न जरुरी रहेको उल्लेख गर्दै मन्त्री अधिकारीले सरकारले घोषणा गरेको कृषिमा लगानी दशक अभियानलाई सफल बनाउन निजी क्षेत्रसँग सहकार्य गरेर अघि बढ्ने प्रतिबद्धता जनाए । निजी क्षेत्रलाई कृषिमा लगानी बढाउन पनि उनले आग्रह गरे ।
गरिबीबाट मुक्ति पाउनका लागि पनि प्रत्येक परिवार कम्तीमा कृषिमा आत्मनिर्भर हुन जरुरी छ भन्दै मन्त्री अधिकारीले पछिल्लो समय कृषि कर्म गर्नेहरूको संख्या घट्नु चिन्ताको विषय भएको बताए ।
मन्त्री अधिकारीले आफ्नो ध्यान कृषि कर्मगर्नेहरुलाई प्रोत्साहन गर्नमा केन्द्रित रहेको बताए । कार्यक्रममा नेपाल चेम्बर अफ कमर्सका अध्यक्ष कमलेश अग्रवाल, वरिष्ठ उपाध्यक्ष दीपक मलोहत्रा, नेपाल सरकारकी सहसचिव सवनम शिवाकोटी, चेम्बर अफ कमर्सको कृषि जडीबुटी तथा बनजन्य समितिका सभापति कृष्णमान श्रेष्ठलगायतले आफ्नो धारणा राखेका थिए ।
यो खबर पढेर तपाईलाई कस्तो महसुस भयो ?
प्रतिक्रिया