शेयर बजारमा फर्कियो उत्साह, नेप्से ४६.६९ अंकले बढ्यो

काठमाडौं । शेयर बजारमा आज मंगलबार पनि हरियाली छाएको छ । लगातार तीन दिन घटेको बजारमा यो साताको सोमबारबाट उत्साह देखिएको हो ।

मंगलबार ४६.६९ अंकले बढेको बजार २६९२.०५ विन्दुमा पुगेको छ । यस दिन ६ अर्ब १२ करोड ८२ लाख रुपैयाँ भन्दा बढीको शेयर कारोबार भएको छ ।

कारोबारमा आएका ३१९ कम्पनी मध्ये २५८ वटा कम्पनीको शेयर बढेको छ । ३५ वटा कम्पनीको मूल्य घटेको छ । सबैभन्दा धेरै निर्जीवन बिमा कम्पनीको शेयर मूल्य बढ्यो । यसदिन समृद्धि फाइनान्स कम्पनीले सबैभन्दा बढी कारोबार गरेको छ ।

यस कम्पनीको २४ करोड ७१ लाख रूपैयाँको कारोबार भएको छ। दोस्रोमा पिपुल्स हाइड्रो पावरको बढी कारोबार भएको छ भने सप्तकोशी डेभलपमेन्ट बैंक कारोबारका हिसावले तेस्रोमा आएको छ । यसैगरी, विकास बैंक र होटेल समूहको कारोबारमा पनि वृद्धि भएको छ ।

आज कारोबार रकममा पनि सुधार भएको छ। सोमबार ५ अर्ब ३४ करोड रूपैयाँको कारोबार भएकोमा मंगलबार ६ अर्ब १२ करोड रूपैयाँको शेयर कारोबार भएको छ।

यसदिन सप्तकोशी डेभलपमेन्ट बैंक, सानिमा जिआइसी इन्सुरेन्स र कुथेली बुखरी स्मल हाइड्रोपावरको शेयर मूल्यमा सकारात्मक सर्किट लागेको छ।