काठमाडौं । नेपालमा समलिङ्गी विवाहलाई मान्यता दिनु सामाजिक, सांस्कृतिक एकतालाई भत्काउने विदेशीको षड्यन्त्र भएको सरोकारवालाहरूले बताएका छन् ।
बुधबार काठमाडौंमा ‘नागरिक सरोकार नेपाल’ले आयोजना गरेको कार्यक्रममा बोल्दै उनीहरूले सर्वोच्च अदालत विदेशीको प्रभावमा परेर समलिङ्गी विवाहलाई मान्यता दिएको आरोपसमेत लगाएका हुन् ।
बक्ताहरले नवनिर्वाचित अमेरिकी राष्ट्रपति डोनाल्ड ट्रम्पले समलिङ्गी सम्बन्धको विरोधी भएको र रुसी राष्ट्रपति भ्लादिमिर पुटिनले सो विवाह गरे मृत्युदण्ड दिँदासमेत नेपालमा किन भन्ने प्रश्न पनि गरेका छन् ।
राष्ट्रिय मानव अधिकार आयोगका पूर्व सदस्य डा.केबी रोकायाले नेपालमा सर्वोच्च अदालतको एकल इजलासले दिएको अन्तरिम आदेशकै भरमा समलिङ्गी विवाह दर्ता हुनु दुर्भाग्य भएको बताए । रोकायाले देशलालाई दीर्घकालीन् असर पार्ने मुद्दामा सर्वोच्चको एकल इजलासको आदेशमाथि आशङ्का गर्ने ठाउँ भएको बताउँदै भने,‘जिल्ला र उच्चले कानुन नभएको भन्दै इन्कार गरेको विषयमा सरकारलाई कुन शक्तिले त्यसलाई कार्यान्वयन गर्न विवष पार्यो ?’
‘रुसमा समलिङ्गी विवाह गरिए मृत्युदण्ड दिने व्यवस्था रहेको छ, युगान्डाले समलिङ्गी विवाह विरोधी कानुन पास गरेपछि अमेरिकाले आर्थिक नाकाबन्दी लगायो, युरोपियन युनियनले सम्पूर्ण सहयोग र विश्व बैंकले ऋण बन्द गरे, अब भन्नुस यो एजेण्डा कसको हो’ रोकायाले भने । उनले नेपालमा विदेशीहरूले जबरजस्त लादेको बताउँदै संसारमा २१० वटा राष्ट्रहरूमध्ये ३५ वटा देशहरूमा मात्रै यस किसिमको विवाहलाई मान्यता दिइएको र नेपाल एसियामै पहिलो राष्ट्र भएकोप्रति डा.रोकायाको चिन्ता व्यक्त गरे ।
समाजसेवी डा.सुन्दर थापाले नेपाललाई कमजोर बनाउन विदेशीले लादेको एजेण्डालाई कानुनी मान्यता दिनबाट रोक्न व्यापक जनदबाब रहेको बताए । थापाले आफूहरू समलिङ्गी नागरिकहरूप्रति नकारात्मक नभएको तर प्राकृतिक, सामाजिक, सांस्कृतिक, धार्मिक र मौलिकतालाई विखण्डन गर्ने योजनामा आएको विदेशी षड्यन्त्रको विरोधमा रहेको स्पष्ट पारे ।
नेकपा (एमाले)का युवा नेता प्रकाश रोकायाले सदियौँदेखि नेपाल र नेपालीबीच भाँजो हालेर देशलाई विखण्डन तथा कमजोर गर्ने योजना सफल नभएपछि अहिले समलिङ्गी सम्बन्धको षड्यन्त्रकारी विदेशी योजना भएको आरोप लगाए । उनले नेपालका मुख्य राजनीतिक दलहरुको यस सम्बन्धमा आधिकारिक धारणा आउनुपर्ने मागसमेत राखे ।
आयोजक नागरिक सरोकार नेपालका कार्यकारी निर्देशक डा.जोमेश वडले नेपालमा पछिल्लो समय समलिङ्गी विवाह, भ्रूण हत्या तथा लिङ्ग परिवर्तन जस्ता भयावह विकृतिहरू मौलाएकोमा चिन्ता व्यक्त गरे । वडले बर्सेनि ९० हजार भ्रूण हत्या हुने गरेको बताउँदै भने, ‘भ्रूण हत्या छाँदैछ अब लिङ्ग परिवर्तन अनि समलिङ्गी विवाहले नेपालको जनसंख्या रित्याएर समाज र देश कमजोर बनाउने एजेण्डालाई कुनै पनि हालतमा खारेज गर्नुपर्छ ।’
नागरिक सरोकार नेपालका सचिव विदुर अधिकारीले नेपालको मौलिकता मासेर विदेशी एजेण्डालाई आङ्गाल्नेहरुलाई पहिचान गरेर सार्वजनिक गर्नुपर्ने बताए । अधिकारीले देशमा आवश्यक र जनपक्षिय कामभन्दा विदशीहरुको योजनाको भण्डाफोर गर्नु पर्ने धारणा राखे ।
यो खबर पढेर तपाईलाई कस्तो महसुस भयो ?
प्रतिक्रिया