दुर्गा प्रसाईँको चेतावानी– ‘मंसिर ३ गते नेताहरूको दिमाग हल्लिने भ्रष्टाचारका प्रमाणसहित प्रस्तुत हुन्छु’

काठमाडौं । मेडिकल व्यवसायी दुर्गा प्रसाईँले सबै विद्यार्थीको प्लस टु पछिको शिक्षा नेपालमै हुनुपर्ने बताएका छन् । 

शुक्रबार पत्रकार सम्मेलन गर्दै उनले नेपालको पैसा नेपालमै रहनुपर्ने बताउँदै मेडिकल शिक्षा, इन्जिनियरिङ शिक्षा र पाइलटको पढाई समेत नेपालमै हुनुपर्ने बताएका हुन् ।

उनले भने, ‘पैसा भन्दा पनि ठूलो कुरा फस्ट नेपाल, फस्ट नेपाली र  नेपालको पैसा नेपालमै रहनुपर्छ । सबै विद्यार्थीको प्लस टु माथिको पढाई नेपालमै हुनुपर्छ ।  मेडिकल शिक्षा नेपालमै हुनुपर्छ, इन्जिनियरिङ शिक्षा नेपालमै हुनुपर्छ, पाइलट टेनिङ र पाइलटको पढाइ पनि नेपालमै हुनुपर्छ बाहिर जान नपरोस् र नेपालमा जे पनि सम्भव छ भन्ने उद्देश्यका साथ म अगाडि बढेको छु ।’ 

साथै उनले मंसिर तीन गते नेताहरूको दिमाग हल्लिने भ्रष्टाचारका प्रमाण सहित प्रस्तुत हुने बताए । उनले तीन गते कसैले नसोचेको  र नदेखेको कुरा कुन नेताको कुन कम्पनीमा कति लगानी छ भनेर सिग्नेचर सहित प्रस्ट पार्ने बताए ।